Ramazanda temeki tastaǵandardyń esimi jamaǵattyń duǵasyna qosylady - «Áziret Sultan» meshiti
ASTANA. 15 tamyz. QazAqparat - Ramazan aıynda temeki tastaǵandardyń esimi elordadaǵy «Áziret Sultan» meshitinde ótken Qadyr túninde jamaǵattyń duǵasyna qosyldy. Bul ıgi shara aldaǵy ýaqytta da jalǵasady.
Aılardyń sultany qasıetti Ramazan aıy bastalarda «Áziret Sultan» meshitiniń alǵashqy juma ýaǵyzynda meshittiń bas ımamy Qaırat Joldybaıuly jamaǵatty temeki sekildi jaǵymsyz ádetterdi tastaýǵa shaqyrǵan bolatyn. Ótken juma ýaǵyzynda da ımam: «Ramazan aıynyń aldyndaǵy ýaǵyzymdy estip, soǵan amal etken, ıaǵnı temekiden arylǵan naǵyz erler bar bolsa, maǵan jolyǵyp, esimderińizdi aıtyp ketińizder. Biz Qadir túninde sol azamattarymyzdy Ramazan aıynda ómirine bir ózgeris jasaǵany úshin, jaman ádetten jırenip, jaqsy qadam basqany úshin myńdaǵan jamaǵattyń aldynda attaryn atap, duǵa-tilekterimizge qosamyz», - degen edi. Allaǵa shúkir, biraz baýyrlarymyz ımamnyń aıtqan sózin qulaǵyna asyp, ózderiniń temekiden qutylǵanyn aıtyp kelgen bolatyn. Ol azamattardyń esimderi Qadir túninde aıtylyp, jamaǵattyń duǵasyna qosylady. Osyǵan oraı, jamaǵattyń duǵa-tilegin alǵysy keletin temeki tastaǵan azamattar bolsa, meshit olardy qatarǵa qosylýǵa shaqyryp, habarlasýdy da suraıdy.
