Ramazanda brıtandyq «Channel 4» ulttyq arnasynda aı boıy azan shaqyrylady
ASTANA. 12 shilde. QazAqparat - Brıtandyq musylmandar 2013 jyldyń qasıetti Ramazan aıyn bútkil koroldik aýqymynda atap ótpek.
Qasıetti aıdyń qurmetine arnap «Channel 4» ulttyq arnasynda búkil aı boıy azan shaqyrylatyn bolady. Bul týraly muftyat.kz saıty habarlap otyr.
«Buǵan deıin bir de bir telearna búkil Tumandy Albıon aýmaǵyna azan daýysyn taratpaǵan edi. Sonymen qatar, «Channel 4» arnasynda musylmandarǵa arnalyp «A Very British Ramadan» (naǵyz Brıtandyq Ramazan) atty baǵdarlama kórsetiledi dep kútilýde. «A Very British Ramadan» baǵdarlamasyn regbıdiń burynǵy oıynshysy Rashıd Han júrgizetin bolady. Bul baǵdarlamada ol Ulybrıtanııanyń túkpir-túkpirin aralap, musylmandardyń ómirimen jaqyn tanystyratyn bolady», - dep jazady Qazaqstan musylmandary dinı basqarmasynyń resmı saıty.
