Ramazan Orazov Slovenııanyń «Koper» fýtbol klýbyna aýysty

ASTANA. QazAqparat - Qazaqstandyq jartylaı qorǵaýshy Ramazan Orazov Slovenııanyń «Koper» fýtbol klýbyna aýysty. Bul jóninde komandanyń baspasóz qyzmeti málim etti, dep habarlaıdy QazAqparat tilshisi.

Slovenııalyq klýb bul jańalyqty óziniń ınstagramm jelisindegi resmı paraqshasynda jarııalaǵan kreatıvti beınejazba arqyly jetkizdi.

Onda fýtbolshynyń komandanyń klýbtyq dúkeninen jeıdeni alyp, ústine kıgennen keıin stadıon alańyna bettep bara jatqany túsirilgen. Beınejazbaǵa qosymsha «Kim ekenin tabyńyz» degen jazba qaldyrylǵan. Bul jumbaq keıipker - 25 jastaǵy Ramazan Orazov bolyp shyqty.

Aıta ketsek, qazaqstandyq fýtbolshy Qostanaıdyń «Tobyl» komandasy sapynan slovenııalyq klýbqa aýysty.

Ramazan Orazov 1998 jyly 30 qańtarda Almaty qalasynda dúnıege kelgen. Qazirge deıin elimizdiń «Qaırat», «Aqtóbe», «Aqsý», «Tobyl», Latvııanyń «Daýgavpıls» jáne Reseıdiń «Chaıka» klýbtarynda oıyn kórsetti.

Ol ulttyq qurama sapynda 2021 jyldan beri toǵyz oıynǵa qatysty.

Eske salsaq, budan buryn fýtboldan premer-lıgada «Ordabasy» «Tobylmen» teń tústi.