Ramazan Orazov mansabyn Slovenııanyń taǵy bir klýbynda jalǵastyrýy múmkin

Qazaqstandyq fýtbolshy Ramazan Orazov Slovenııa chempıonatynda mansabyn odan ári jalǵastyrýy múmkin. Oǵan sol eldiń «Tsele» komandasy qyzyǵýshylyq tanytyp otyr, dep habarlaıdy Kazinform.

Bul jóninde slovenııalyq «Koper» klýbynyń sport dırektory Ivıtsa Gýberats málim etti.

Qazaqstandyq jartylaı qorǵaýshy 2023 jyldyń jaz aıynan bastap atalǵan klýbtyń namysyn qorǵap keldi.

«Tsele» bıyl el chempıonatynda kósh bastap tur. Byltyr kúmis júldeger bolsa, 2019/20 jylǵy maýsymda jeńis tuǵyryna kóterildi.

«Tsele» basshylyǵy tarapynan Ramazan Orazovqa qatysty usynys jasaldy. Qazir kelissóz júrgizip jatyrmyz. Olardyń qyzyǵýshylyǵy bar, sheshimin kútemiz», — dedi Gýberats.

«Koper» Ramazan Orazovty jańa klýbyna tegin berýge nıet tanytyp otyr. Negizinde onyń kelisimshart merzimi 2025 jyldyń maýsym aıynda aıaqtalady.

Ramazan Orazov «Koper» sapynda 12 oıynǵa qatysyp, bir goldyń avtory atandy. Komanda qazir el chempıonatynda 19 týrdan keıin úshinshi orynda keledi.

Ramazan Orazov 1998 jyldyń 30 qańtarynda dúnıege kelgen. Birqatar qazaqstandyq klýbtarda, Latvııa, Reseı komandalarynda oınaǵan.

Ulttyq qurama sapynda 2021 jyldan beri 22 oıynǵa qatysyp, bir márte mergendik tanytty.

Eske salsaq, budan buryn eýropalyq klýb Ramazan Orazovtyń oıynyna kóńili tolmaı, kelisimshartty buzatynyn habarlaǵan edik. 

Sondaı-aq álemniń eń qymbat fýtbol klýbtarynyń tizimi jarııalandy.