Ramazan Orazov «Elimaı» sapyna qosyldy

ASTANA. KAZINFORM – Fýtboldan Qazaqstan ulttyq quramasynyń jartylaı qorǵaýshysy Ramazan Orazov Semeıdiń «Elimaı» komandasyna aýysty. Bul jóninde semeılik klýbtyń baspasóz qyzmeti málim etti. 

– Ramazan Orazov danııalyq «Sılkeborg» klýbynan semeılik «Elimaı» sapyna erkin agent retinde aýysqanyn resmı habarlaımyz. Mansabynyń mańyzdy bóligin elimizdiń bedeldi klýbtarynda ótkizgen oıynshy «qazaqtyń Modrıchi» laqap atymen keńinen tanymal. Slovenııa men Danııa birinshiliginde oınaý tájirıbesi bar oıynshyǵa týǵan eline qosh keldiń deımiz, - dep jazylǵan habarlamada.

Ramazan Orazov 1998 jyly 30 qańtarda Almaty qalasynda dúnıege kelgen. Qazirge deıin elimizdiń «Qaırat», «Aqtóbe», «Aqsý», «Tobyl», Latvııanyń «Daýgavpıls» jáne Reseıdiń «Chaıka», Slovenııanyń «Koper» klýbtarynda oınady.

Eske salsaq, budan buryn qazaqstandyq fýtbolshy Ǵalymjan Kenjebek semeılik «Elimaı» komandasyna aýysqan bolatyn.