Ramazan Orazov danııalyq «Sılkeborg» oıynshysy atandy

ASTANA. KAZINFORM – Qazaqstandyq fýtbolshy Ramazan Orazov danııalyq klýbtyń qataryn tolyqtyrdy. 

«Aqtóbe» fýtbol klýby Ramazannyń «Sılkeborg» komandasyna (Danııa) aýysqanyn resmı túrde habarlady.

Orazov 2021 jyly «Aqtóbe» sapyn tolyqtyryp, 2022 jyly aq-qyzyldarmen birge Qazaqstannyń kúmis júldegeri atanǵan bolatyn. Qostanaılyq «Tobyl» sapynda da sátti maýsym ótkizip, eýrokýboktyq oıyndarda tamasha oıynymen kózge tústi. Shveıtsarııalyq «Bazel» komandasyna gol soǵyp, eýropalyq skaýttardyń nazaryn ózine aýdardy. Keıin slovenııalyq «Koper» oıynshysy atanyp, onda bir maýsym óner kórsetkennen soń «Aqtóbege» qaıta oraldy.

Dat klýbynyń sport dırektory Iesper Stıýker qazaqstandyq fýtbolshynyń oıynyna joǵary baǵasyn berdi. 

«Ol alańdy jaqsy kóre biledi jáne dopty ózinde keremet ustaıdy. Orazovqa qyzyǵýshylyq tanytyp, oıynyn baqylap júrgenimizge bir jyldan asty. Skaýttar ony Qazaqstan quramasynyń sapynda Danııaǵa qarsy ótkizgen oıynynan keıin baıqady», - dedi «Sılkeborg» klýbynyń ókili.

Iesper Shtıýker Ramazan jáne onyń agentimen tez til tabysyp, ortaq mámilege kelgenin de atap ótti. 

«Biz Qazaqstannan oıynshyny kúnde shaqyra bermeımiz. Biraq men de, bas bapker Kent Nılsen de Orazovpen tez til tabysyp kettik. Onyń qalaǵa, jergilikti chempıonatqa tez beıimdelip ketetinine senimimiz mol», - dedi fýnktsıoner.

Ramazan Orazov «Sılkeborg» klýbyna resmı túrde 26 maýsym kúni aýysady. Oǵan deıin «aq-qyzyldar» sapyndaǵy barlyq oıynǵa qatysady. 

Aıta keteıik, «Sılkeborg» – Danııa kýbogynyń ıegeri. Eýropa lıgasynyń irikteý kezeńinde óner kórsetedi.