Ramazan aıynda Shahtınsk qalasynda 26 otbasy jańa baspanaǵa ıe boldy

Esterińizde bolsa, Elbasymyz N.Nazarbaev Qazaqstan halqyna joldaǵan «Nurly Jol» baǵ­darlamasynda qoljetimdi tur­ǵyn úı qurylysyn qaıta qarastyrýdy jáne qazaq­s­tan­dyqtardy qoljetimdi, arzan baspanamen qamtamasyz etýdi tapsyrǵan bolatyn. Memleket basshysynyń bul tapsyrmasy bizdiń qalamyzda da júzege asyrylýda. Ata-anasynyń qam­qorlyǵynsyz qalǵan balalar, múgedekter, kóp balaly otbasylar, ardagerler jáne bıýdjet mekemeleriniń qyzmetkerleri qala basshysynyń tabystaǵan páter kiltin qýanysh­pen qolǵa alyp, qonys toıyn toılaýǵa asyqty.

Osy kúni saltanatty sha­ra­ǵa jańa páterge ıe bol­ǵandardyń jaqyn-jýyqtary, dos-jarandary da qatysyp, qýanyshtaryna ortaq boldy. Qala ákimdiginiń ǵımaraty  tur­­ǵyndarǵa toldy. Tula boıyn bılegen shattyq sezimderimen bólisken turǵyndar jańa baspanalaryn kórýge asyqty. Tipti, keıbir otbasylar jańa pá­­­ter­lerin jarqyraǵan jıhaz­darmen tol­tyrýdy oılastyryp qoıyp­ty.

Qonys toıyn toılaǵaly otyr­ǵan jańa páter ıelerine «Siz­der osy kúndi uzaq  kút­tińizder. Elbasynyń tapsyrmasyna sáıkes, Qazaqstan Res­pýblıkasynyń Úkimeti óńirlerdi damytýdyń 2020 jylǵa deıingi baǵdarlamasyn ázirlep, tur­ǵyn úıge muqtajdardy bas­pa­namen qamtýǵa kóńil bólindi. Qasıetti Ramazan aıynda búgin Elbasynyń qoldaýymen jańa baspanaǵa ıe bolyp otyrsyzdar. Jańa úılerińiz sábılerdiń kúlkisine tolsyn, bereke-birlik arylmasyn», - dedi qala basshysy Serjan Jańabekuly.

Biz jańa páterge ıe bolǵan­dardyń keıbirin áńgimege tarttyq.

Nadejda Aıýhanova, Uly Otan soǵysynyń ardageri:

- Kóp jyldan beri jekejaıda turyp keldim.Tozyǵy jetken baspanamnan jańa úıge kóshetinime qýanyshtymyn. Eli­mizdiń kósh­­basshysy, hal­qymyzdyń qamqorshysy Nursultan Ábishuly Nazarbaev­qa sheksiz alǵysymdy aıtamyn. Allanyń nury jaýsyn.

Nazym Barlybaı, jas otbasy múshesi:

- Qalamyzdyń 30-shy ora­myndaǵy qyzǵylt sary tústi der­bes turǵan kóp qabatty tur­ǵyn úıden maǵan da páter berilgendigine baqyttan basym aınalyp tur. Jańa páterge ıe bolsam ǵoı, balalarym úıimizde asyr salyp oınasa eken dep kóp armandýshy edim. Ramazan aıynda Alla taǵala tilegimdi qabyl etti. Elbasymyz otbasymnyń qan­shalyqty rıza ekenin bilse ǵoı.

Roza Qapar, kóp balaly ana:

- Balalarym búgin baqytty. Osy kúndi ańsap, asyǵa kútken bolatyn. Memleket basshysyna analyq aq tilegimdi jaýdyramyn. Elimiz tynysh, merekeli bolsyn, baspanaǵa muqtaj ózge de januıalar jańa úıge qol jetkizip, qonys toıyn toılasyn.

Sondaı-aq, basylymnyń bul sanynda «Nesıe maquldandy» atty maqala jaryq kórgen.

Kásipkerler palatasynda shaǵyn nesıe­leýdiń jańa baǵdarlamasyna qatysýǵa ótinim bergen kásipkerlerdiń jobalary qa­raldy. Olar Aqsý, Balqash, Kerbulaq aýdandarynyń kásipkerlerinen túsken 7 ótinim. Nesıe komıtetiniń sheshimi boıynsha barlyq ótinimder biraýyzdan maquldandy. Eske salalyq, shaǵyn bıznes sýbektileri úshin 600 mln. teńgeni «Atameken» UKP jáne Almaty oblysy ákimdigi bóldi.

«Qant qyzylshasyn ósirý jaıly tórt joba, mal sharýashylyǵy boıynsha eki  jáne jalpy somasy 34 mln. 300 myń teńge arpa ósirý jónindegi bir ótinim maquldandy. Qaryz alýshylar - sharýa qojalyǵy ókilderi jáne jeke kásipkerler ekendigin basa aıtý kerek»,- deıdi Almaty oblystyq Kásipkerleri palatasynyń dırektory Lázzat Shyńǵysbaeva.

Qazirgi ýaqytta aýyl sharýashylyǵyn qarjylyq qoldaý qoryna sheshimder hattamalary berildi. Olardy qaraǵan soń qarjy uıymy qaryz alýshylarmen qaryz alý jáne aqsha  quraldaryn odan ári aýdarýǵa arnalǵan kepil shartyn jasaıdy. Sonymen qatar, shaǵyn nesıeleý baǵdarlamasy boıynsha qor 62 ótinim jóninde qarjy-ekonomıkalyq taldaý, zańgerlik saraptama júrgizedi. Jaǵymdy sheshim shyqqan jaǵdaıda jobalardy Nesıe komıtetiniń  músheleri qaraıdy.

Atap ótelik, komıtettiń alǵashqy máji­lisin­de jalpy somasy 75 mln. teńgeden astam 20 ótinim qaraldy jáne maquldandy. Bul jobalardyń barlyǵy óńirdiń qyzylsha salasyn damytýǵa baǵyttalǵan. Shaǵyn nesıeleý baǵdarlamasynyń basty ereksheligi - jer ýchaskelerin, turǵyn úı qurylystaryn jáne basqadaı múlikti kepil retinde qaraý. Sondaı-aq, syıaqy mólsherlemesi jyldyq  6%-dy  quraıdy,  syıaqynyń jyldyq tıimdi mólsherlemesi 6,7%-dan aspaıdy.

Odan bólek, gazettiń osy sanynda «Keleshekke kemel qadam» atty maqala basyldy.

«Elbasymyz «Qazaqstan jańa jahandyq naqty ahýalda: ósim, reformalar, damý» atty Joldaýynda: «Biz - azattyq týyn jelbiretip, Táýelsiz memleket atanǵanymyzdyń 25 jyldyǵyna aıaq basamyz. Bul - Táýelsizdikti nyǵaıtý jolyndaǵy ólsheýsiz eńbegimizdiń shırek ǵasyrlyq belesin qorytyndylaıtyn mereıli sát», - dep atap kórsetti. Aldymyzda damyǵan ozyq 30 eldiń qataryna kirýmen birge «Máńgilik El» ıdeıasyn iske asyrý sekildi tolaǵaı mindetter tur. Ótkenge oı júgirtsem, Táýelsizdik alǵannan bergi kezeńde ne atqar­dym, elimniń órkendeýine qan­daı úles qostym, degen saýal kes-kesteıdi. Iá, egemendiktiń eleń-alań shaǵynda kúrmeýi kóp kóptegen ekonomıkalyq qıyn­dyqtarǵa kezikkenimiz ras. Onyń bári keshegideı kóz aldymyzda. Memleket basshysynyń týra joldan adastyrmaı, alǵa je­te­leýiniń arqasynda shırek ǵasyrlyq me­reıtoıǵa da jetip otyr­ǵanymyzǵa shúkirshilik deımiz» delingen maqalada.

Sol kezderi qurylǵan «Ba­­­­byq-Burlyq» JShS-i bú­ginde oblystaǵy iri astyq sha­rýashylyqtarynyń biri. Biz de táı-táıláp ósken sábı qusap ósý, tolysý, tájirıbe jınaqtaý kezeńderin bastan keshirdik. Alǵashqy qadamymyzdy keńestik dáýirden qalǵan eski «Nıva», «Enıseı» kombaındarymen, «DT-75», «T-4», «T-40», «ıÝMZ-6» traktorlarymen bastadyq. Qazir «QazEksportAstyq» holdınginiń quramynda jumys istep jatqan­dyqtan qoldaý kórsetiledi.

Seriktestiktiń ıeliginde 25 myń gektar egistik pen ja­ıylym bar. Jyl saıyn dán­di jáne maıly daqyldar, bir­jyl­dyq jáne kópjyldyq mal azyqtaryn ósirip, mol ónim alyp kelemiz. Astyqtyń gektar berekeligin 30 tsentnerge deıin jetkizgen tustarymyz boldy. Sharýashylyqta óndiris kólemin arttyrý maqsatymen tehnıkalyq qaıta jaraqtandyrýǵa, qor únem­deý tehnologııasyn engizýge, mı­neraldy tyńaıtqyshtardy jáne ósimdik qorǵaý zattaryn tıimdi paıdalanýǵa aıryqsha kóńil bólinedi. Bizdiń mamandarymyz AQSh, Kanada, Germa­nııa sekildi órkenıetti elderge ba­­ryp, óndiristik tájirıbeden ótti. Sóıtip, astyq óndirisiniń nóldik tehnologııasymen jumys isteý tájirıbesin úırenip keldi. Sońǵy jyldary syıymdylyǵy 13500 tonnaǵa jeteǵabyl 9 as­tyq saqtaıtyn qondyrǵy iske qosyldy. Seriktestiktiń ǵımaraty men mashına-traktor parkin, naý­baıhana men aýyldyq klýbty jy­lytý úshin zamanaýı qazandyq ornatyldy.

Keıingi ýaqytta mal sharýa­­­­­shylyǵyn damytý baǵdar­la­­­masyna belsene atsalysyp ke­lemiz. Kompanııanyń qarjylyq qoldaýymen qazaqtyń etti aqbas sıyrlary satyp alyndy. Tuqym sharýashylyǵy mártebesin ıe­lenip, mal basy eki myńǵa jet­ti. Kanadadan 10 gereford asyl­tuqymdy atalyq mal ákelindi. Mal soıý jáne qoldan uryq­tan­dyrý qosyndary jumys isteıdi.

Seriktestik je­ke­men­shik-memleket árip­testigi aıasynda sharýashylyq aýmaǵyndaǵy mek­tepterge jyl saıyn jón­deý jumystaryn júrgizip, oqý­­shylardy tegin tamaqpen qamtamasyz etedi. Tómengi Bur­lyq aýylyndaǵy dárigerlik ambýlatorııa qalpyna keltirildi. Agroqurylymnyń kúshimen balabaqsha, Mádenıet úıi qalpyna keltirildi. Jaqsy Jalǵyztaý aýylynda qoǵamdyq monsha iske qosyldy. Jastar úshin dámhanasy bar jazǵy bı alańy ashyldy. Jańa stadıon, «Arlan» jabyq muz aıdyny, aýyl turǵyndary demalatyn «Konstıtýtsııa alańy» paıdalanýǵa berildi.

Qat-qabat tirshiliktiń jete­ginde júrsek te, aýyl­dyq­tar­dyń áleýmettik máselelerin na­zardan tys qaldyrmaımyz. Jylyjaılarda kókónister ósirilip, turǵyndar men bala­baqshaǵa, mektepke qoljetimdi baǵamen bosatylady. Bir sóz­ben aıtqanda, el ıgiligi úshin atqarylyp jatqan azdy-kópti jetistikterge bostandyqtyń aq tańynyń arqasynda qol jet­kizgenimizdi zor baqyt sanaımyz. Keleshekke kemel qadammen basa otyryp, el rızyǵyn eseleı túsýge barlyq kúsh-jigerimizdi jumyldyratyn bolamyz.

Sondaı-aq, «Qazyǵurtta lımon ósirile bastady» degen habar maqalasy da osy sanda jaryq kórgen.

«Kúni keshege deıin shetelden tasymal­danyp kelgen lımon Ońtús­tik jurty úshin tańsyq bolýdan qaldy. Saryaǵash, Saıram dıqandary ósirip kelgen tsıtrýsti jemis búginde taýly aýdan sanalatyn Qazyǵurtta da jersine bastady» dep jazylǵan maqalada.

Qazyǵurt aýdany, Qaqpaq aýylynyń turǵyny Ospanáli Taqsyqbaev jylyjaıǵa otyr­ǵyzǵan 640 túp lımon aǵashynyń árqaısysynan 17-18 kılo araly­ǵynda jemis jınap aldy.

Asa myqty dárýmender qata­ryna jatqyzylatyn lımon­nyń baǵasy da kóńildegideı. Dıqan jınap alǵan on bir tonna lımonnan túsken tabys ony qanattandyryp, jylyjaı kólemin taǵy da art­tyrýǵa bel baılatyp otyr.

Saryaǵashtaǵy tájik orta mek­tebiniń dırektory ekken lımon týraly gazetimizde burynyraqta jazǵan edik. Áýelde qan qysymyn tómendetý maqsatynda ekken otbasy lımonnyń úlken paıda kózi ekendigine kóz jetken. Búginde olardyń ónimin jyl saıyn Reseı kásipkerleri kóterme baǵamen alyp ketedi.

Osylaısha, lımon jemisi aşy bolǵanymen, tabysy tátti bolyp tur.

«Agrarlyq bilimdi jańǵyrtý arnalary». Bul taqyryppen basylǵan maqalada Almatydaǵy Qazaq ulttyq agrarlyq ýnıversıtetinde Qazaqstan Respýblıkasynyń Memlekettik hatshysy Gúlshara Ábdiqalyqovanyń qatysýymen ótken TMD-nyń jetekshi agrarlyq joǵary oqý oryndary rektorlary keńesiniń qorytyndy otyrysy týraly jazylǵan.

Keńes jumysyna Táýelsiz Mem­leketter Dostastyǵy aıma­ǵy­nyń 10 elinen kelgen 30-dan asa joǵary oqý oryndarynyń rektorlary, Qa­zaqstan Respýblıkasy Aýyl sha­rýashylyǵy mınıstrliginiń jáne «Ulttyq agrarlyq ǵylymı-bilim berý ortalyǵy» kommertsııalyq emes aktsıonerlik qoǵamynyń ókilderi, Qazaqstannyń jetek­shi agrarlyq joǵary oqý oryn­darynyń rektorlary, ǵylymı-zert­teý ınstıtýttarynyń dı­rektor­lary, eksperımentaldyq-tájirı­belik sharýashylyqtardyń jáne aýyl­sharýashylyq ónimderin óndirý­men aınalysatyn kásipker­ler qatysty.

Keleli keńes «Agrarlyq bilim­niń TMD keńistiginde jańǵyrýy» taqyrybynda ótti. Atap aıtqanda, jańa agrarlyq mamandyqtardy ashý jáne birlesken bilim berý baǵdarlamalaryn ázirleý boıynsha jumystardy uıymdastyrý, agroónerkásiptik keshende jańa tehnologııalardy ázirleý jáne taratýdyń zamanaýı, tıimdi jáne básekege qabiletti júıesin qurý, álemdik bilim berý keńistigine ıntegratsııalaný sekildi búgingi tańda asa mańyzdy máseleler  talqylandy.

Memlekettik hatshy óziniń ki­rispe sózinde Elbasy Nursul­tan Nazarbaevtyń «Qazaq­stan-2050» Strategııasy: qalyp­tas­­qan memlekettiń jańa saıası baǵyty» atty Joldaýynda HHІ ǵasyrdyń jahandyq 10 syn-qateri qataryna jahandyq azyq-túlik qaýipsizdigine tónetin qater jatatyndyǵyn aıtqandyǵyn jet­kizdi. Sondyqtan, ulttyq qaýip­­sizdiktiń quramdas bóligi retin­de azyq-túlik qaýipsizdigin qam­ta­masyz etý Qazaqstannyń táý­el­siz memleket retinde damýy­nyń basty sharty bolyp tabylady.

TMD elderiniń agro­óner­kásiptik kesheniniń ınnovatsııa­lyq damýynda ǵylymı ázirle­meler men zertteýlerge úlken mán beriledi. Bul jerde 2003 jyly qurylǵan TMD agrarlyq joǵary oqý oryndary rektorlary keńesiniń mańyzy zor. Atalǵan keńes kadrlardyń kásibı biliktiligin arttyrý jáne olardy qaıta daıyndaý, TMD-nyń jetekshi agrarlyq joǵary oqý oryndary oqý-ádistemelik birlestikteriniń ózara qarym-qatynasyn jáne basqa da halyqaralyq uıymdarmen baılanys ornatý arqyly jo­ǵary oqý oryndarynyń ózara ynty­maq­tastyǵyn uıymdastyrý aýma­ǵyndaǵy jumystardy retteıdi.

Agrarlyq joǵary oqý oryndarynyń basshylary joǵary oqý ornyn ulttyq zertteý ýnıversıtetine transformatsııalaý, agrarlyq ónerkásip salasynda ǵylym, bilim jáne óndiris ıntegratsııasy mehanızmderin damytý, memlekettik-jekemenshik áriptestigin damytý jáne taǵy da basqa mańyzdy máseleler tur­ǵy­synda tájirıbelerimen almasty.

G.Ábdiqalyqova keńes barysynda aýyl sharýashylyǵyndaǵy jańa tehnologııalardy damytý men almastyrý úshin nysanaly izdenispen aınalysatyn ýnıversıtet janynan qurylǵan Agrotehnıkalyq habty basqarýdyń uıymdastyrýshylyq qurylymymen tanysty. Aýyl sharýashylyǵy ǵylymynyń teorııasy men tájirıbesi arasyndaǵy baılanystyrýshy býyn retinde tanylǵan mundaı habtar búgingi tańda AQSh, Argentına, Brazılııa, Izraıl jáne Avstralııa elderinde tabysty jumys istep tur. Sonymen qatar, Memlekettik hatshy ushqyshsyz ushatyn apparattar - drondarmen aýyl sharýashylyǵy alqaptaryn aldyn ala tekserýmen aınalysatyn Turaqty egin sharýashylyǵy ortalyǵynyń ashylý saltanatyna qatysty.