Ramazan aıynda ózge dinı senimdegi 5 adam ıslam dinin qabyldady - Jetisý aýdanynyń bas ımamy
ALMATY. 16 shilde. QazAqparat - Oqýshylardyń jazǵy demalysy kezinde elimizdegi barlyq meshitterde dinı saýat ashý kýrstary men jazǵy lagerler uıymdastyrylýda.
Bul týraly keshe Almaty qalasynyń Jetisý aýdanyndaǵy Sultanqorǵan meshitiniń buqaralyq aqparat quraldary ókilderi úshin uıymdastyrǵan aýyzasharynda aıtyldy.
«Adamnyń sanasy joǵarylaǵan saıyn ıslam dinin túsiný, onyń aqıqatyna kózderi jetip qabyldaýshylardyń kóbeıe beretini aqıqat. Máselen, bizdiń Jetisý aýdanynda Ramazan aıynyń ishinde ǵana ózge dinı senimdegi 5 adam meshitke kelip ıslam dinin qabyldady. Al jyl basynan beri olardyń sany 14 adamǵa jetti», - deıdi Jetisý aýdanynyń bas ımamy Cerikhan Yrymhanuly.
Bas ımamnyń aıtýynsha, Jetisý aýdanynda 6 meshit, 10 namazhana bar. Jazǵy demalysta Qazaqstan musylmandary dinı basqarmasynyń uıytqy bolýymen búkil elimizdegi meshitterde saýat ashý kýrstary men jazǵy lagerler ashyldy. Máselen, Jetisý aýdanyndaǵy «Al-Medıne» ortalyq meshitinde ǵana Ramazan aıyna deıin 60 balaǵa jazǵy lager uıymdastyryldy.
