Ramazan aıynda Mańǵystaý meshitterinde kún saıyn 5 myńǵa jýyq adamǵa aýyzashar beriledi
«Ramazan aıy - Allaǵa qulshylyq etýge, izgi amaldar isteýge, boıdaǵy ımandy kúsheıtýge múmkindik beretin asa berekeli aı. Bıyl óńirimizdegi 40 meshittiń 20-synda taraýyq namazy, hatym Quran oqylady» dedi Mańǵystaý oblystyq Beket ata meshitiniń bas ımamy Ánýar Eljanov.
Qazaqstan musylmandary dinı basqarmasy sáýir aıynyń 17-nen 18-ne qaraǵan túnin qasıetti qadir túni dep belgilegen. Al 21 sáýir – oraza aıt merekesi. Sondaı-aq, pitir sadaqanyń mólsheri elimiz boıynsha 2 keli unnyń ortasha baǵasymen eseptelgen.
«Bıyl pitir sadaqanyń mólsheri - 535 teńge. Dáýletti adamdar sadaqany qurma, meıiz baǵasymen de berýine bolady. Pidııa(fıdııa) tóleýge shamasy kelmeıtin musylmandar pitir qunymen de pidııa bere alady. Osy rette kásipker azamattardy, saýda ortalyqtarynyń basshylaryn qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa shaqyramyn», - dedi oblystyń bas ımamy.
