Ramazan aıynda qyzyl aımaqta ornalasqan meshitterge qoıylatyn talaptar jarııalandy

NUR-SULTAN. QazAqparat – Ramazan aıynda qyzyl aımaqta ornalasqan meshitterge qoıylatyn talaptar belgili boldy. Ony búgin Qazaqstan musylmandary dinı basqarmasy tóraǵasynyń orynbasary, naıb múftı Ershat qajy Ońǵar jarııa etti, dep habarlaıdy QazAqparat tilshisi.

«Qyzyl aımaqta ornalasqan meshitterge qoıylatyn talaptar sál qatańdaý bolady. Meshitte namaz oqıtyn oryndarǵa, aýyzasharǵa qatysty tərtip: bes ýaqyt namazdy tek jekelegen túrde oqý, ıaǵnı jamaǵatpen oqymaý; Namaz oqýshylardyń ara qashyqtyǵy 2 metr bolyp arnaıy belgilengen oryndarda oqý; Namaz oqıtyn zaldarda ımamdar jəne namaz oqıtyn adamdar mindetti túrde betperdemen bolý; Oraza ustaǵan adamdarǵa múmkindiginshe aýyzashar qorjynyn jetkizip berý arqyly uıymdastyrý; Jasy úlken kisiler, densaýlyǵy nashar adamdar (er jəne əıel) jəne jas balalar namazdaryn úılerinde oqý. Taraýyq namazy oqylmaıdy. Namaz oqyp bolǵan soń múmkindiginshe meshitten tezirek shyǵý kerek», - dedi naıb múftı Ortalyq kommýnıkatsııalar qyzmetindegi brıfıng barysynda.

Onyń atap ótýinshe, bul talaptar jergilikti bas sanıtarlyq dərigerdiń sheshimine səıkes ózgerip otyrady.

«Bul talaptar sizderdiń densaýlyqtaryńyzdy saqtaý maqsatynda jasaldy. Sondyqtan QMDB bekitken talaptarǵa túsinistik tanytyp, olardy oryndaýǵa shaqyramyz», - dedi Ershat qajy Ońǵar.