Ramazan aıynda birqatar qaıyrymdylyq shara uıymdastyrylady - Bas múftı

ASTANA. QazAqparat — Ramazan aıynda birqatar qaıyrymdylyq is-sharasy uıymdastyrylady. Bul týraly Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly aıtty, dep habarlaıdy QazAqparat tilshisi.

«Ramazan – izgi amaldardyń saýaby eselenip jazylatyn aı. Islam ǵalymdarynyń aıtýynsha, izgi amaldyń saýabynyń erekshe eselenýiniń sebepteri bar. Birinshisi, izgilik jasalǵan jerge qatysty. ıAǵnı, orynnyń qurmettiligine qaraı onda oryndalǵan is-amaldyń saýaby da eselenedi. Mysaly, úıde oqylǵan namazdan meshitterde oqylǵan namazdyń saýaby aıryqsha kóp. Іzgi amaldyń saýabynyń eselenýiniń taǵy bir syry onyń oryndalǵan ýaqytyna baılanysty», - dedi Bas múftı BAQ ókilderine arnalǵan baspasóz máslıhatynda.

Mysaly, onyń atap ótýinshe, Zýl-hıdja aıynyń alǵashqy onkúndiginde jáne Ramazan aıynda jasalǵan qaıyrly isterdiń mártebesi bıik bolady.

«Sondyqtan osy aıda múmkindiginshe muqtaj jandarǵa kómektesip, olardyń alǵysy men batasyn alýǵa asyqqan abzal. «Zeket jáne qaıyrymdylyq» qory qasıetti Ramazan aıynda birneshe qaıyrymdylyq jobalardy júzege asyrady. Atap aıtqanda, «Sharapatty Ramazan», «Ramazan qorjyny», «Ramazannan táberik» syndy aýqymdy respýblıkalyq qaıyrymdylyq is-sharalardy uıymdastyrady. Barsha halyqty saýapty isterimizge úles qosyp, jaqsylyqtyń basy-qasynan tabylyp, belsendi túrde atsalysýǵa shaqyramyn», - dedi Naýryzbaı qajy Taǵanuly.