Ramazan aıynda «jyldam ári kóp tamaqtaný» asqazanǵa aýyr túsedi

ASTANA. KAZINFORM — Qara teńiz Tehnıkalyq ýnıversıtetiniń Medıtsına fakýlteti gastroenterologııa kafedrasynyń dotsenti Arıf Mansýr Djoshar oraza ustaý asqazan-ishek júıesine belgili bir ýaqytqa demalys beretinin aıtty, dep habarlaıdy Anadoly agenttigi.

Djoshardyń sózinshe, aýyz bekitý jalpy densaýlyqty qoldaý úshin usynylady, alaıda aýyr dertke shaldyqqan adamdar dárigermen keńesip, oraza ustaı ala ma, joq pa, sony sheshýi kerek.

Dotsent Ramazan aıy kezinde asqazan-ishek jumysynyń buzylysyna shaǵymdanatyn adamdar sany artatynyn atap ótti. Ásirese burynnan asqazan nemese ishek aýrýlary bar naýqastar uzaq ýaqyt ash qalǵannan keıin tym kóp tamaqtansa, aýrý belgileri ýshyǵýy múmkin. Mundaı adamdarǵa oraza aıy boıy dárilerdi muqııat qabyldaý mańyzdy.

Ol asqazandy qorǵaıtyn preparattardy aýyz bekiter aldynda jarty saǵat buryn qabyldaýdyń mańyzdy ekenin, al qalǵan dárilerdi asqazan-ishek aýrýlaryn emdeý úshin úsh nemese eki ret — aýyzasharda, aýyz bekiterde jáne uıyqtar aldynda qabyldaýǵa bolatynyn aıtty.

Tamaqtaný boıynsha keńester

Maman kez kelgen ýaqytta turaqty jáne durys tamaqtanýdyń mańyzdy ekenin atap ótti. 

— Barlyǵyna jaraı beretin jalpy dıetalar bolmaıdy. Adamdar óz aǵzasyn baǵalap, jaqpaıtyn ónimderden aýlaq bolý kerek. Ramazan aıy kezinde birden kóp jeýge bolmaıdy, tamaqty az-azdan jáne baıaý shaınaý kerek. Dastarhannan toıǵanyńyzdy sezbes buryn turyp ketińiz. Osy erejege mindetti túrde mán berý qajet, — dedi dáriger.

Dotsent Ramazannyń alǵashqy kúnderin adaptatsııa kezeńi dep atady.

— Asqazan nemese ishek problemalary joq adamdarda da tamaqtaný rejıminiń ózgerýine baılanysty shaǵymdar týyndaýy múmkin. Alǵashqy birneshe kúnde bul aıtarlyqtaı seziledi, al Ramazan aıynyń sońynda organızm beıimdelip ketedi, — dedi ol.

Osyǵan deıin Ramazan aıynda elimizde poıyzdardaǵy vagon-restorandar arnaıy kestege kóshkeni belgili boldy.