Ramazan aıynda poıyzdardaǵy vagon-restorandar arnaıy kestege kóshti

ASTANA. KAZINFORM — Qasıetti Ramazan aıynyń bastalýyna baılanysty «Jolaýshylar tasymaly» AQ poıyzdaryndaǵy vagon-restorandar arnaıy keste boıynsha qyzmet kórsetedi. Bul týraly «Jolaýshylar tasymaly» AQ baspasóz qyzmeti málim etti.

— Atalǵan tártip 40 vagon-restoranda engiziledi. Vagon-restorandar kún saıyn saǵat 8:00–den túngi 24:00–ge deıin qyzmet kórsetedi. Oraza ustaýshylarǵa yńǵaıly bolý úshin sáresi ýaqytynda — saǵat 04:00–den 05:00–ge deıin ashyq bolyp, jolaýshylarǵa oraza bastalǵanǵa deıin tańǵy astaryn ishe alady, — delingen habarlamada.

Buǵan qosa Ramazan aıynda vagon-restorandarda arnaıy ázirlengen mázir toptamalary usynylady. Aýyzashar kezinde vagon-restorandarda jolaýshylarǵa sý men qurma tegin beriledi. Bul ýaqytta poıyzdarda alkogol ónimderi satylmaıdy.

«Jolaýshylar tasymaly» AQ barlyq musylman qaýymyn qasıetti Ramazan aıynyń bastalýymen quttyqtap, rýhanı kemeldený men izgi tilekterin bildirdi. 

Al, Qazaqstannyń ár óńirinde aýyzashar máziriniń baǵasy qansha ekenin bilgińiz kelse, myna siltemege ótińiz.