Ramazan aıynda Qurandy basynan aıaǵyna deıin oqydym – Ýıll Smıt
ASTANA. KAZINFORM – Gollıvýd juldyzy Ýıll Smıt Ramazan aıynda Quran Kárimdi tolyǵymen oqyp shyqqanyn jarııalady. Bul jaıynda akter Big Time Podcast podkastyna bergen suhbatynda aıtty.
Ýıll Smıt ómiriniń sońǵy eki jylynyń qıyn bolǵanyn, bul onyń ishki álemine oı júgirtýge túrtki bolǵanyn atap ótti. Bul kezeńde akter barlyq qasıetti kitaptardy, sonyń ishinde Qurandy da oqyǵan.
– Byltyr Ramazan aıynda Qurandy basynan aıaǵyna deıin oqydym. Maǵan Qurannyń qarapaıymdylyǵy men túsinikti bolǵany unady. Árbir sóz óte anyq jáne túsinikti túrde jazylǵan. Onyń krıstaldaı óte ádemi reńi men tazalyǵy bar, – dedi akter.
Sondaı-aq Quran maǵynasynyń oǵan qalaı áser etkeni týraly aıtty. Belgili akterden Qurandy tolyq oqýdan qandaı áser alǵanyn suraǵanda, ol kitapta Musanyń qansha ret aıtylǵanyna tańǵalǵanyn, onyń qyzyqty bolǵanyn, paıǵambardyń oqıǵasy men onyń basynan ótken oqıǵalary adamdy eljiretkenin aıtty.
– Men onyń qarapaıymdylyǵyna tań qaldym... Quran qarapaıym jáne ondaǵy barlyq nárse aınadaı anyq... jáne ony oqyǵannan keıin túsinbeýshilikke barý óte qıyn, – dedi ol suhbatynda.
Málimet úshin, Ýıllard Kerroll Smıt II 1968 jyly 25 qyrkúıekte Fıladelfııada dúnıege kelgen.
«Korol Rıchard» fılmindegi Rıchard Ýılıams róli úshin «Úzdik akter» nomınatsııasynda Oskar, «Akterler gıldııasy» jáne «Altyn globýs» syılyǵyn, sondaı-aq eki Grammy syılyǵyn jeńip alǵan.
2008 jyly Forbes nusqasy boıynsha Ýıll Smıt Gollıvýdta eń kóp jalaqy tólenetin akterleriniń tiziminde birinshi oryndy ıelenip, jylyna 80 mıllıon dollar tabys tapqany aıtyldy.
