Ramazan Álimqulov: Muǵalimder jańa formatta attestattaýdan ótedi
- Ramazan Sıqymuly, qaı kategorııaǵa bárinen kóp ótinish berilip otyr?
- Ásirese, «pedagog-sarapshy» kategorııasyna 22 125 muǵalim ótinish bergen. Odan sál ǵana az kategorııada - «pedagog-zertteýshige» 18 327 ótinish kelip tústi. Sonymen qatar, «pedagog-moderatordyń» enshisinde 17 846 ótinish, «pedagog-sheberdiń» enshisinde 1990 ótinish bar.
- Biliktilik boıynsha kategorııanyń kútilip otyrǵan shekti deńgeıi qandaı?
- «Pedagog-moderator» úshin - 50%; «pedagog-sarapshy» úshin - 60%; «pedagog-zertteýshi» úshin - 70%; «pedagog-sheber» úshin - 80%. Sonymen qatar, árbir blok boıynsha shekti deńgeıdi baǵyndyrý kerek. Shekti deńgeıge jete almaǵan jaǵdaıda pedagogıkalyq qyzmetkerler emtıhannan qaıtadan qarasha aıynda óte alady.
- Aıtyńyzshy, testileýdiń eski formaty jańasynan nesimen erekshelenedi?
- Muǵalimderdiń testileýden ótýi burynnan kele jatyr. 2010 jyldan bastap 2017 jylǵa deıingi merzimde attestatsııadan ótýge nıet bildirgen 140 myń muǵalim Pedagogıkalyq qyzmetkerlerdiń biliktilik testileýine (PQBT) qatysty. PQBT-nyń eski formaty 3 bloktan turǵan: Qazaqstan Respýblıkasynyń zańnamasyn, pedagogıka men psıhologııa negizderin, pándik bilim negizderin bilý.
«Qazaqstan Respýblıkasynyń zańnamasyn bilý» blogy Ulttyq biliktilik testileýdiń jańa formatynan alynyp tastaldy. Endi testileý eki bloktan turady: «Oqý pániniń mazmuny» jáne «Pedagogıka, oqytý ádistemesi». Ulttyq biliktilik testileý sonymen qatar, 100 test tapsyrmasynan tursa, onyń ishinde «Oqý pániniń mazmunyna» 70-i , «Pedagogıka, oqytý ádistemesine» 30-y tıesili. Test tapsyrmalarynyń mazmuny durys jaýapty tańdaýdan turatyn testterden, sondaı-aq mátindi oqyp, maǵynasyn túsinip, tapsyrmalarǵa jaýap beretin mátindik tapsyrmalardan turady.
- Test tapsyrmalarynyń aldyn ala saraptamasy júrgizildi me?
- Saraptama eki aıdyń ishinde Astana, Almaty jáne Pavlodar qalalarynda ótkizildi. Sonymen birge, test tapsyrmalarynyń qoldanystaǵy normatıvtik qujattarǵa - memlekettik jalpyǵa mindetti bilim berý standarttaryna, tıptik baǵdarlamalarǵa, testtik erekshelikterge, ádistemelik usynymdarǵa, tehnıkalyq tapsyrmalarǵa jáne taǵy basqa talaptarǵa sáıkestigi tekserildi. Bul saraptama jumysyna tájirıbeli oqytýshylardan 154 sarapshy atsalysty. Osynyń nátıjesinde 60180 synaq tapsyrmasy usynymǵa engizildi. Ulttyq biliktilik testileý úshin tártipterdiń tizimi klassıfıkatordaǵy mamandyqtar negizinde jasaldy.
- Ulttyq biliktilik testileýdi ótkizýge kimniń quqyǵy bar?
- Onyń uıymdastyrýshysy - bizdiń Ulttyq testileý ortalyǵy, attestatsııalyq komıssııalar, QR BǴM ókilderi men baǵdarlamashylary, Respýblıkalyq apellıatsııalyq komıssııa men ornyndaǵy Apellıatsııalyq komıssııalar. Attestattaý komıssııasynyń quramyna tájirıbeli oqytýshylar, ádiskerler, ǵylymı jáne pedagogıkalyq keńestiń, bilim berý birlestikteriniń, biliktilikti arttyrý ınstıtýttarynyń, qoǵamdyq jáne úkimettik emes uıymdardyń, kásipodaqtardyń ókilderi, Bilim basqarmasynyń mamandary men kadrlyq qyzmetkerler kiredi.
- Sizdiń qaramaǵyńyzdaǵy UTO-nyń jaýapty organ retinde testterge daıyndyq dárejesi qandaı?
- Qazirdiń ózinde 55 pándi esepke alǵanda, 31 pánniń tizimi jasaldy. Ár pán boıynsha testterdiń spetsıfıkatsııalary daıyn. Negizgi testileýge arnalǵan saýal-kitapshalar ázirlenip jatyr. Ár pán boıynsha 25 nusqa bar desek, barlyǵy - 1325 maket bar. Test tapsyrmalarynyń kúrdeliligi tómendedi. Osylaısha, durys jaýapty tańdaý kezinde nusqalardyń sany jıyrmadan onǵa azaıdy.
- Bul saladaǵy muǵalimderdi ornynda testileýge daıyndyq jumystary týraly ne aıtasyz? Testileý qandaı merzimde ótedi jáne olardyń ótýine qansha ýaqyt bólinedi?
- Qazirgi ýaqytta jergilikti bilim berý organdary ótinishterdi aǵymdaǵy jyldyń 2 mamyryna deıin qabyldap jatyr. Testileý 26 mamyr men 5 maýsym aralyǵynda testileý alańdarynda ótkiziledi. Qazirgi ýaqytta pýnkterdiń sany shamamen - 60. Testileýge 200 mınýt, al «Matematıka», «Fızıka», «Hımııa», «Informatıka» pánderi boıynsha 230 mınýt beriledi.
- Nátıjelerge baılanysty appelıatsııaǵa berýge bola ma? Bolsa qandaı túrde jáne qandaı merzimde appelıatsııaǵa berýge bolady?
- Testileýden keıingi kelesi kúni muǵalimder apellıatsııa boıynsha saǵat 13:00-ge deıin ótinish bere alady. Testileý aıaqtalǵannan keıin barlyq pedagogıkalyq qyzmetkerlerge synaq nátıjeleri boıynsha sertıfıkat tapsyrylady.
- Oqytýshylar synaq tapsyrmalary týraly tolyq aqparatty qaıdan ala alady?
- Búgingi kúni «Egemen Qazaqstan» gazetinde árbir taqyryp boıynsha testtiń synaq tapsyrmalary basylyp shyǵýda. Ulttyq biliktilik testileýdi ótkizý protsedýralary boıynsha halyqqa jappaı aqparat berý úshin testtiń suraqtary sonymen birge UTO saıtynda jáne áleýmettik jelilerde jarııalanyp jatyr. Muǵalimder ol jerden aqparatty jáne tolymdy ınfografıkany, sondaı-aq jaýap paraqshasyn toltyrý boıynsha erejeler jazylǵan vıdeorolıkterdi kóre alady. Sonymen qatar, UTO saıtynda PQBT-dan onlaın testileý de bar.
- Árıne, kóptegen muǵalimder synaq testileýdiń bir rettik baǵasy qansha ekenin bilgisi keletini anyq...
- Bar-joǵy 264 teńge.
- Suhbat bergenińiz úshin rahmet!
Avtor: Gúlmıra Sarbasova