«Ramada plaza» qaıtadan koronavırýs ınfektsııasyna shaldyqqan patsıenterdi qabyldaıdy

NUR-SULTAN. QazAqparat – «Ramada plaza» qaıtadan koronavırýs ınfektsııasyna shaldyqqan patsıenterdi qabyldaıdy. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.

«Búgingi kúni ınfektsııalyq aýrýdyń qaıtadan óskenin baıqap otyrmyz. 28 maýsymda tańǵy ýaqyt boıynsha ınfektsııalyq statsıonarlarda 1 403 patsıent jatyr. Onyń ishinde KVI-ge shaldyqqandar sany – 1256 adam, pnevmonııamen – 147. Osylaısha júkteme 70 paıyzdy qurap otyr», - dedi basqarma basshysy.

Tımýr Muratovtyń atap ótýinshe, qalada statsıonarlardyń tósek-oryn qýaty 2 026 oryndy quraıdy. Onyń 2 001-i ınfektsııalyq, 25-i karantındik tósek-oryn sanalady. Qazirgi ýaqytta KVI kúresýge 14 statsıonar, onyń ishinde 13-i ınfektsııalyq, 1-ýi karantındik statsıonar jumyldyrylǵan.

«Esterińizge sala ketsek, ótken jyly kovıdti statsıonar, keıin karantındik statsıonar retinde ashylǵan, ınfektsııalyq statsıonarǵa qaıta beıimdelgen burynǵy «Ramada plaza» qonaq úıin japqan bolatynbyz. Qazir jaǵdaıdy eskere otyryp, bizge sol jerde qaıtadan 500 oryndy ınfektsııalyq tósekter ornalastyrýǵa týra kelip otyr. Osylaısha, «Ramada plaza» qaıtadan koronavırýstyq ınfektsııaǵa shaldyqqan patsıenterdi qabyldaıtyn bolady», - dedi ol.