Rallı jarystan álem chempıonatynyń Qazaqstanda qashan ótetini belgili boldy
ALMATY. QazAqparat - Elimizde tuńǵysh ret rallı-reıdten ótetin álem chempıonatynyń ýaqyty naqty belgilendi, búgin osy jańalyqty resmı túrde jarııalap otyrmyz, dedi QR Avtomotokólik federatsııasynyń prezıdenti Marat Ábiqaev búgin baspasóz máslıhatynda. Bul týraly QazAqparat tilshisi habarlaıdy.
Marat Ábiqaevtyń aıtýynsha, Halyqaralyq avtokólik federatsııasynyń dúnıejúzilik keńesi ótken aıdyń sońynda otyrys ótkizip, 2017 jyly bolatyn avtkólik jarystarynyń kúntizbesin bekitken.
«Federatsııamyz elimizdiń tarıhynda tuńǵysh ret rallı-reıdter boıynsha Álem kýboginiń bir kezeńin ótkizý quqyǵyna qol jetkizdi. Rally Kazakhstan 2017 jarysynyń Qazaqstanda ótetin ýaqyty maıyr aıynyń 20-27 aralyǵyna belgilendi. Jarys Mańǵystaý oblysynda Aqtaý men Jańaózen qalalary aımaǵyndaǵy oıly-qyratty, qumdy jerlerde júredi», - dedi Marat Ábiqaev.
Bıylǵy bekitilgen kúntizbe boıynsha rallı jarystar aqpan aıynda Reseıde bastalady. Sodan keıin, sáýir aıynda BAÁ men Katarda ótip, mamyrda Qazaqstanǵa jetedi. Qazaqstannan keıin Italııa, Ispanııa, Vengrııa, Polsha, Marokko, Portýgalııada ótkizilmek. Jalpy, 2017 jylǵy rallı jarystar 10 kezeńnen turady.
Aıta ketý kerek, atalǵan elderden jarys eń uzaǵy úsh kún bolsa, Qazaqstanda 6-kúnge sozylmaq.
Jarysty uıymdastyrýshylardyń biri Andreı Cherednıkovtiń aıtýynsha, rallı jarysqa qatysýshylar Mańǵystaý oblysy boıynsha barlyǵy 2450 shaqyrym jolda jarysady.
«Jarysqa qatysýshylar barlyǵy 2 450 shaqyrym júredi, onyń 630 shaqyrymyn tas jolmen júrse, 1 820 shaqyrymdy jolsyz jerlermen júrip ótedi. Onyń ishinde Senek eldi mekeni mańyndaǵy buırat qumdardy keship ótedi. Bul - óte qıyn aımaq. Jarysqa qatysýshylar tań qalatyn shyǵar», - dedi Andreı Cherednıkov.
Onyń aıtýynsha, qazirgi ýaqytta shashamen 50 qatysýshy tilek bildirgen. Onyń 10-y Qazaqstannan, qalǵany shetelden.
«Ázirge 50 qatysýshy bar, bul naqty dep aıtpaımyz, áli de qosylýy múmkin», -dedi A. Cherednıkov.
Búgingi baspasóz máslıhatyna arnaıy kelgen Rally Kazakhstan 2017 jarysynyń basshysy, Halyqaralyq avtokólik federatsııasynyń dúnıejúzilik keńesi tóraǵasynyń orynbasary Fred Gallaher Qazaqstandaǵy rallı óte qyzyqty ótetinine senim bildirdi.
«2017 jylǵy rallı-reıd jarystarynyń qazaqstandyq bóligi óte qyzyqty ótedi dep oılaımyn. Qazaqstannyń tabıǵaty, jer bederi san alýan. QR Avtomotokólik Federatsııasy osy jarystyń Qazaqstanda ótýine sońǵy tórt jylda óte kóp eńbek sińirdi», - dedi Fred Gallaher.
