Rallı Dakar: «Astana» júk kólikteri arasynda - 14-shi orynda
ALMATY. 7 qańtar. QazAqparat - Búgin Perýdiń Pısko qalasynda 5 qańtar kúni Lıma qalasynda jalaýy kóterilgen 34-shi «Rallı Dakar» transqurlyqtyq rallı-marofonynyń 343 shaqyrymdyq úshinshi kezeńi ótýde.
Lıma (263 shaqyrym) men Pıskoda (327) ótken alǵashqy eki kezeńniń qorytyndysy boıynsha, júk kólikteri arasynda «Astana» ekıpajy (Artýr Ardavıchýs, Alekseı Nıkıjev, Nurlan Turlybaev) 14-shi orynda keledi.
Erteńnen bastap sportshylar ártúrli qashyqtyqta baq synaıtyn bolady. Máselen, Naska qalasynan bastalyp, Arekıpa qalasynda márege jetetin 4-shi kezeńniń jarys joly mototsıkldermen - 718, avtomobıldermen 717 shaqyrymdy quraıdy.
Jalpy qashyqtyǵy 8 myń shaqyrymdy quraıtyn bul dúbirli doda Perý, Argetına, Chılı elderiniń aýmaǵy arqyly ótedi. 15 kezeńnen turatyn jarysta sportshylar mototsıklder, jol talǵamaıtyn kólikter jáne júk kólikteri arasynda ózara saıysqa túsýde. Jarystar 19 qańtar kúni Chılıdiń Santıago qalasynda márege jetedi. Byltyr Argentınanyń Mar-del-Plata qalasynda bastalyp, Perýdiń Lıma qalasynda aıaqtalǵan 8 336 shaqyrymdyq bul básekede Qazaqstannyń «Astana» komandasy úzdik úshtiktiń qataryna enip, kúlli álemniń sport súıer qaýymyn eleń etkizgen bolatyn.
