Raqymshylyqqa ilikken aqtóbelik zańsyz qarý saqtaǵan
AQTÓBE. QazAqparat - Aqtóbe oblystyq Іshki ister departamentiniń Uıymdasqan qylmysqa qarsy kúres, ekstremızmge qarsy kúres basqarmalary buryn birneshe ret sottalǵan, jat aǵym jeteginde júrgen kúdiktini ustady, dep habarlaıdy QazAqparat tilshisi.
«Birneshe ret buzaqylyq jasap, zańsyz qarý saqtaǵan kúdikti ustaldy. Ol adam óltirgen, úsh ret sottalǵan jáne dástúrli emes dinı aǵymdy ustanady. Kúdiktiniń reseılik nómerli «Rendj-Rover» markaly avtokóliginen 3 ańshy qarýy tabylyp, tárkilendi. Mártók aýdanyndaǵy turǵylyqty jerin tintý barysynda kesilgen uńǵy tabyldy. Sonymen qatar, 1965 jylǵy Ózbekstan azamaty, 1974 jylǵy Aqtóbe qalasynyń turǵynyn quldyqta ustaǵandyǵy dáleldendi. Osy derekter boıynsha Qylmystyq kodekstiń «Qarýdy zańsyz jasaý», «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý», «Bas bostandyǵynan zańsyz aıyrý», «Tonaý» baptary boıynsha qylmystyq is qozǵaldy. Ol on jylǵa deıin bas bostandyǵynan aıyrylýy múmkin», - dep aqparat taratty oblystyq ІІD baspasóz qyzmeti.
Aıta keteıik, kúdikti ótken jyldyń qarasha aıynda «Makarov» tapanshasyn saqtap, ustaǵany úshin 3 jylǵa bas bostandyǵynan aıyrylǵan bolatyn. Keıin ol Táýelsizdiktiń 25 jyldyǵyna oraı raqymshylyqqa ilikti.
«Kúdikti taǵy da aýyr qylmys jasap, azamattar men mekemelerge shabýyl jasaý úshin qarý daıyndaǵan»,- dedi oblystyq ІІD baspasóz hatshysy Nurgúl Qonaqbaeva.
Derekterge súıensek, oblystyq ІІD-niń qyzmetkerleri dástúrli emes dinı aǵym ókilderinen barlyǵy 6 birlik qarýy jáne jarylǵysh zat, 2 tapansha tárkilegen.
