Raqymshylyq zańy jazasyn ótep jatqan 11 myń 985, sotta isi qaralyp jatqan 3 myń 935 tulǵaǵa qoldandy

Bul týraly búgin QR Joǵarǵy Sotynyń  aǵymdaǵy jyldyń birinshi jartyjyldyǵyn qorytyndylaýǵa arnalǵan brıfıng barysynda resmı ókil Oksana Peters málim etti.

Eske sala ketsek, aǵymdaǵy jyldyń 22 qańtarynda «Qazaqstan Respýblıkasynyń memlekettik táýelsizdiginiń jıyrma jyldyǵyna baılanysty raqymshylyq jasaý týraly» zańy qoldanysqa enip, 6 aıdan soń, ıaǵnı shildeniń 22-sinde onyń qoldanylýy toqtatyldy.  Іzgilik qaǵıdaty negizinde qabyldanǵan quqyqtyq-normatıvtik akti negizinen ortasha jáne kishigirim qylmys jasaǵan jasóspirimderge, aıaǵy aýyr jáne jasóspirim balalary bar áıel adamdarǵa, zeınetkerlerge, 1-2-3 toptaǵy múgedekterge, UOS qatysýshylary men múgedekterine jáne olarǵa teńestirilgen tulǵalarǵa, áskerılerdiń jesirlerine qoldanylǵan bolatyn. Sondaı-aq, raqymshylyq aýyrlyǵy ortasha qylmys jasaǵan jáne soǵan oraı taǵaıyndalǵan jaza merziminiń tórtten birin ótegen tulǵalarǵa qatysty da qoldanylǵan edi. Budan bólek, atalmysh zań qoldanysqa engizilgenge deıingi barlyq qylmystyq ister, sonymen qatar sottar áli qaramaǵan aýyrlyǵy ortasha jáne kishigirim ister qysqarǵan bolatyn.

«Zań qoldanysqa engizilgen kúnnen bastap, jarty jyl ishinde respýblıka sottary 15 myń 920 tulǵaǵa qatysty, sondaı-aq jazasyn ótep jatqan 11 myń 985 tulǵaǵa qatysty, al sottalýshylar boıynsha 3 myń 935 tulǵaǵa qatysty raqymshylyq zańyn qoldandy», - deıdi O. Peters.