Raqymshylyq barysynda zańdastyrylǵan qarajatqa salyq salynbaıdy - B. Sultanov
ASTANA. QazAqparat - Búgin Astanada Ortalyq kommýnıkatsııalar qyzmetinde ótken baspasóz máslıhatynda QR Premer-Mınıstriniń orynbasary - Qarjy mınıstri Baqyt Sultanov Qazaqstanda ótkizilgeli otyrǵan kóleńkeli ekonomıkadaǵy qarajatty zańdastyrý sharasy týraly aıtyp berdi.
Onyń sózine qaraǵanda, múliktiń zańdastyrylýy 2006-2007 jyldarda ótken sharamen sáıkes bolady. Sonyń negizinde qazir zań jobasy daıyndalýda.
"Al jarııa etiletin aqshaǵa keletin bolsaq, ol tabys bolyp tabylmaıdy. Sol sebepten oǵan salyq salynbaıdy. Sonymen qatar jarııa etken tulǵalar qylmystyq, ákimshilik jáne tártiptik jaýapkershilikke tartylmaıdy. Osy shara barysynda jarııa etilgen qarajattar týraly jeke aqparattar qupııa bolyp saqtalady. Salyqtyq, qyzmettik materıaldar qupııa bolyp qalady", - dedi ol.
Vıtse-premerdiń sózine qaraǵanda, zańdastyrylǵan qarajat ekinshi deńgeıli bankterde ornalastyrylmaq. Sonymen qatar oǵan qatysty balamaly quraldar usynylady.
"Eger adamdar depozıtke aqshalaryn salǵysy kelmese, onda ózge quraldardy satyp alý quqyǵy beriledi. Atap aıtqanda, Qazaqstan ekonomıkasyna quıa alady. Máselen, memlekettik qundy qaǵazdardy, ekinshi deńgeıli bankterdiń oblıgatsııalaryn satyp ala alady, ulttyq kompanııalardyń, damý ınstıtýttarynyń aktsııalaryn, halyqtyq IPO arqyly memlekettik menshiktegi kompanııalardyń qaǵazdaryn ala alady. Sondaı-aq jekeshelendirýdiń ekinshi tolqyny aıasynda múlikti jeke menshigine satyp alýyna bolady", - dedi B. Sultanov.
Eger azamat ony joǵaryda atalǵan quraldarǵa jumsaǵysy kelmese, qarajatty depozıtten sheshýine múmkindik jasalady. Biraq bank ol somadan 10 paıyzdyq alym alady.
"Bul salyq emes, qazaqstandyqtardy el ekonomıkasyna ınvestıtsııalaýǵa yntalandyrýdyń bir quraly. Depozıtte saqtalsa, ol banktiń qoryn kóbeıtedi, eger memlekettik nysandarǵa jumsalsa, el ekonomıkasynyń deńgeıin joǵarylatady", - dedi vıtse-premer.
Onyń aıtýynsha, Memleket basshysynyń tapsyrmasyna oraı, zańdastyrýdy ońtaıly atqarý maqsatynda Úkimette jumys toby quryldy.
