Raqymshylyq aıasyndaǵy qandaı is bolmasyn sýdıa tek qana zańǵa súıenip sheshim shyǵarady - A. Qasymov
ASTANA. 13 aqpan. QazAqparat - Raqymshylyq aıasyndaǵy qandaı is bolmasyn sýdıa tek qana zańǵa súıenip sheshim shyǵarady.
Bul týraly búgin QR Joǵarǵy Sotynda «QR Táýelsizdiginiń 20 jyldyǵyna baılanysty raqymshylyq jasaý týraly» zańyn qoldaný jóninde ótken baspasóz máslıhatynda QR Joǵarǵy Sotynyń qylmystyq ister jónindegi qadaǵalaýshy sot alqasynyń tóraǵasy Aqyltaı Qasymov málim etti.
Alqa tóraǵasynyń aıtýynsha, aǵymdaǵy jyldyń 22 qańtarynan bastap «QR Táýelsizdiginiń 20 jyldyǵyna baılanysty raqymshylyq jasaý týraly» zań qoldanylyp keledi. Bul el táýelsizdigi barysynda 8-shi ret ótkizilip otyrǵan raqymshylyq sharasy bolyp tabylady. «Kúni búginge deıin BAQ-ta jaryq kórgen jańalyqtardyń basym bóligi osy zań aıasynda bostandyqqa shyǵarylǵan azamattarǵa qatysty bolyp otyr. Sonyń ishinde, BAQ keıbir túsinispeýshilik pen burmalaýshylyqqa da jol berip otyrǵanyn baıqaımyz. Máselen, birqatar BAQ «belgili bir qylmystardy jasaǵan azamattar nege týra sot zalynda raqymshylyq alyp bosatylýy tıis» dep jazsa, taǵy bir baǵytta raqymshylyq alǵandardyń 2 apta boıy temir tordyń arǵy jaǵynda otyrǵanyna nazar aýdartady. Buny túsinýlerińiz qajet. Óıtkeni raqymshylyq aıasyndaǵy zań talaptary sondaı», - deıdi Aqyltaı Qasymov.
Sonymen qatar, Joǵarǵy Sot ókili zań aıasynda jazadan bosatylatyn azamattardyń sanatyn taǵy bir eske salyp ótti. Olar: kámeletke tolmaǵandar, júkti áıelder, kámeletke tolmaǵan nemese 1 jáne 2 toptaǵy múgedek balalary bar áıelder, sondaı-aq kámeletke tolmaǵan balalardyń jalǵyz ata-anasy bolyp tabylatyn er adamdar. Budan bólek, jasy 50-ge tolǵan jáne odan joǵary jastaǵy áıelder men 63-ten asqan er azamattar, Uly Otan soǵysynyń qatysýshylary jáne soǵan teńestirilgen azamattar, áskerı jáne ınternatsıonaldyq boryshyn atqarý kezinde qaza tapqan áskerı qyzmetshilerdiń jesirleri, sondaı-aq kúıeýleri soǵys múgedekteri jáne olarǵa teńestirilgen adamdar bolyp tabylatyn áıelder de jazadan bosatylady. Budan bólek, onsha aýyr emes jáne aýyrlyǵy ortasha qylmystar úshin bas bostandyǵynan aıyrýǵa baılanysty emes jaza túrlerine sottalǵan adamdar, eger bul jaza negizgi jaza túrinde qoldanylǵan bolsa, jazadan bosatylady.
