Raqymshyldyq týraly zań jobasy Májilistiń qaraýyna ótedi
ASTANA. 10 mamyr. QazAqparat /Qanat Mámetqazyuly/ - Raqymshyldyq týraly zań jobasy jaqynda Májilistiń qaraýyna beriledi. Dál búgingi kúni atalǵan qujat Parlamenttiń tirkeý protsessine engizilgen.
Bul týraly búgin QR Parlamenti Májilisi Zańnama jáne sot-quqyqtyq reforma komıtetiniń otyrysynda «Qazaqstan Respýblıkasynyń keıbir zańnamalyq aktilerine qylmystyq jáne qylmystyq is júrgizý zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Esterińizge sala keteıik, buǵan deıin QR Prezıdenti Nursultan Nazarbaev Úkimetke respýblıka Táýelsizdiginiń 20 jyldyǵyna oraı elimizde raqymshyldyq jasaý jónindegi zań jobasyn ázirleýdi tapsyrǵan bolatyn. «Biz qazirgi kúni raqymshyldyq týraly zań jobasyna qatysty jumys tobyn belgilep qoıdyq. Aldaǵy aptalarda tártip boıynsha tirkeýden ótken soń qujat Májilistiń Zańnama jáne sot-quqyqtyq reforma komıtetine joldanatyn bolady», - dedi komıtet tóraǵasy Raqmet Muqashev.
Al QR Bas prokýrorynyń orynbasary Iogan Merkel Táýelsizdiktiń 20-jyldyǵy qarsańynda jarııa etiletin aldaǵy raqymshyldyqqa sottalǵandardyń shamamen 13 myńǵa jýyǵy iligetinin atap ótti. «Onyń ishinde bas bostandyǵynan aıyrylǵan oryndardan 3 myńnan astam adam bosap shyǵatyny kútilýde. Qalǵany negizinen bas bostandyǵynan aıyrýmen baılanysty emes qylmys túrleri boıynsha raqymshyldyqqa iligetin bolady. Bulardyń arasyna sot áli qaramaǵan, ortasha aýyr nemese asa aýyr emes qylmystar úshin jaýapty bolǵan tulǵalar da qosylýy múmkin», - dedi I. Merkel. Onyń aıtýynsha, raqymshyldyq negizinen azamattardyń áleýmettik jaǵynan osal sanattaryna, kámilettik jasqa tolmaǵan balalary bar áıelderge, aıaǵy aýyr áıelderge, zeınetkerler men múgedekterge qatysty bolmaq.
