Raqym Oshaqbaev ekologııalyq tólemderdi maqsatsyz paıdalanatyn óńirlerdi atady
NUR-SULTAN. QazAqparat - Elimizdiń birqatar óńiri ekologııalyq tólemderdiń bolar-bolmas paıyzyn ǵana tabıǵatty qorǵaý sharalaryna jumsap otyr. Bul týraly búgin "Talap" qoldanbaly zertteýler ortalyǵynyń dırektory Raqym Oshaqbaev aıtty, dep habarlaıdy QazAqparat tilshisi.
"Aıyrmashylyq tym alshaq. Aıtalyq, Soltústik Qazaqstan oblysynda ekologııalyq tólemderge 2 mlrd teńgeden astam qarajat túskenimen sonyń ne bári 1,5 mln teńgesi ǵana tabıǵatty qorǵaý sharalaryna jumsalady. Lastaýshy kásiporyndar kóp Shyǵys Qazaqstan, Batys Qazaqstan oblystarynda da tólem men shyǵyn arasyndaǵy alshaqtyqqa jol berýge bolmaıdy. Pavlodar oblysynda da 11 mlrd teńge tólem túskenimen sonyń 936 mln teńgesi ǵana tabıǵatty qorǵaý sharalaryna jumsalǵan", - dedi ol elordada ótken "Ekologııalyq zańnamany reformalaý - qazirgi ahýaly men bolashaǵy" taqyrybyndaǵy pikirtalas alańynda.
Osy oraıda Raqym Oshaqbaev QR Energetıka mınıstrliginiń jergilikti atqarýshy organdardy ekologııalyq tólemderdiń 70 paıyzyn tabıǵatty qorǵaý sharalaryna jumsaýǵa mindetteý bastamasyna qoldaý bildirdi.
"Energetıka mınıstrliginiń tabıǵatty qorǵaý sharalaryna jumsalatyn somany 70 paıyzǵa deıin jetkizý sheshimine qoldaý bildiremiz. Negizgi mindet somany ǵana arttyryp qoımaı tıimdiligin de joǵarylatý bolýy tıis", - dedi ol.
Aıta keteıik, "Qazaqstannyń ekologııalyq uıymdary qaýymdastyǵy" ZTB uıymdastyrǵan sharada elimizdiń jańa Ekologııalyq kodeksiniń jobasy talqylandy.
