Raqymshylyqqa ilikken azamattardyń qoǵamǵa qaıta beıimdelýi qalaı júzege asady
ASTANA. KAZINFORM – Qazaqstan Respýblıkasynyń jańa Konstıtýtsııasynyń qabyldanýyna oraı jarııalanǵan raqymshylyq aıasynda jazasyn óteýden bosatylatyn azamattardyń qoǵamǵa tabysty beıimdelýin qamtamasyz etý maqsatynda keshendi áleýmettik qoldaý sharalary kózdelgen.
Áleýmettik beıimdeýdiń negizgi baǵyttarynyń biri — jumyspen qamtý. Bostandyqqa shyqqan azamattarǵa jergilikti atqarýshy organdar men halyqty jumyspen qamtý ortalyqtary arqyly olardyń bilimine, eńbek tájirıbesine jáne densaýlyq jaǵdaıyna sáıkes jumys oryndary usynylady. Qajet bolǵan jaǵdaıda azamattar suranysqa ıe mamandyqtar boıynsha kásiptik oqytý kýrstaryna jiberiledi.
Sondaı-aq bosatylǵan adamdarǵa jeke basyn kýálandyratyn jáne ózge de qajetti qujattardy qalpyna keltirýge kómek kórsetiledi. Bul olardyń jumysqa ornalasýyna, medıtsınalyq jáne áleýmettik qyzmetter alýyna múmkindik beredi.
Turǵylyqty jeri joq nemese qıyn ómirlik jaǵdaıǵa tap bolǵan azamattar áleýmettik beıimdeý ortalyqtaryna ornalastyrylyp, ýaqytsha baspanamen jáne qajetti áleýmettik qoldaýmen qamtamasyz etiledi. '
Qaıta áleýmettendirý úderisinde psıhologııalyq jáne áleýmettik súıemeldeýge erekshe nazar aýdarylady. Probatsııa qyzmetiniń mamandary azamattarǵa jańa ómir jaǵdaılaryna beıimdelýge, otbasymen jáne qoǵammen baılanystaryn qalpyna keltirýge qoldaý kórsetedi.
Bostandyqqa shyqqan azamattarǵa medıtsınalyq kómek alý, áleýmettik qamsyzdandyrý máseleleri boıynsha keńes berý, sondaı-aq quqyqtaryn iske asyrýǵa qatysty quqyqtyq qoldaý kórsetý sharalary da qarastyrylǵan.
Raqymshylyqtyń basty maqsaty — azamattardy jazadan bosatýmen qatar, olardyń qoǵamǵa tolyqqandy oralýyna jaǵdaı jasaý. Osy baǵyttaǵy jumyspen qamtý, bilim berý, medıtsınalyq, psıhologııalyq jáne quqyqtyq qoldaý sharalary adamnyń qalypty ómirge beıimdelýine jáne qoǵamnyń turaqtylyǵy men qaýipsizdigin nyǵaıtýǵa baǵyttalǵan.
Aıta ketelik Senat raqymshylyq jónindegi zańdy maquldaǵan edi.
