Raqymshylyq jarııalaýda halyqtyń usynys-tilegi eskeriledi – QR ІІM
ASTANA. KAZINFORM – Keler aptada elimizde jarııalanatyn raqymshylyq tásilderi týraly aqparat kópshilik nazaryna usynylady. Bul týraly Іshki ister mınıstriniń orynbasary Sanjar Ádilov aıtyp berdi.
Spıkerdiń aıtýynsha, raqymshylyq jarııalaý jóninde arnaıy jumys toby qurylǵan. Olar raqymshylyq qoldanýdyń negizgi tásilderin ázirledi jáne keler aptada jarııalaıdy.
– Barlyq usynys pen qoǵamnyń suranysy óte mańyzdy. Qazir jumys toby olardy jınaqtap jatyr. Biz usynys-tilekterdi kútip qana otyrmaımyz, ınternet keńistigin, buqaralyq aqparat quraldaryn, sonyń ishinde áleýmettik jelilerdi de baqylap, monıtorıng jasaımyz. Barlyq usynys jınalyp, júıelenip, raqymshylyqty qoldaný múmkindigi turǵysynan mindetti túrde zerdelenedi. Naqty málimetti kelesi aptada beremiz. Bul jumystardy Májilis depýtattarymen birlesip, osy sessııada júrgizemiz, - dedi S. Ádilov Senat kýlýarynda tilshilerge bergen suhbatynda.
Tilshiler ásirese «zakladchıkter» men avtokólik júrgizýshilerine qatysty jazany jeńildetý kóp suralatynyn aıtyp, raqymshylyqqa ilige me dep surady.
– Ózderińiz bilesizder, ótken jyly mańyzdy ózgerister boldy. Bul aýyr qylmys sanatynan aýyr sanatqa aýystyryldy jáne «zakladchıkter» men óndirýshilerdiń jaýapkershiligi bólindi. Sondyqtan biz ınternettegi jarııalanymdardy, BAQ pen áleýmettik jelilerdi muqııat baqylap otyrmyz. Munyń bári mindetti túrde eskeriledi. Aıtaıyn degenim, amnıstııamen birneshe mınıstrlik pen vedomstvo aınalysyp jatyr. Tek ákimshilik profılaktıka sýbektileriniń ózi 70-ten asady. Sondyqtan nátıjesin kúteıik. Bul – úlken ujymdyq jumys, - dedi S. Ádilov.
Aıta keteıik, Prezıdent Konstıtýtsııany qabyldaýǵa arnalǵan saltanatty jıynda qylmystyq jáne ákimshilik quqyqbuzýshylyq boıynsha raqymshylyq jasalatynyn aıtqan edi.
Depýtattardyń aıtýynsha, shamamen 17 myń adamǵa raqymshylyq jarııalanýy múmkin.
Buǵan deıin spıker shymkenttik Nuraı Serikbaıdy óltirdi degen kúdiktiniń psıhıkalyq aýytqýy rastalmaǵanyn, sotta aqyl-esi durys adam retinde jaýap beretinin aıtqan edi.
