Raqymshylyq zańy shetelde sottalǵan qazaqstandyqtarǵa qalaı qoldanylady
ASTANA. KAZINFORM – Іshki ister mınıstriniń orynbasary – Qylmystyq atqarý júıesi komıtetiń tóraǵasy Abaı Qaıyrbekov Konstıtýtsııanyń 30 jyldyǵyna arnalǵan raqymshylyq týraly zań shetelde jazasyn ótep jatqan qazaqstandyqtarǵa qalaı áser etetinin túsindirdi.
— Qazaqstan sottary úkim shyǵarǵan, biraq el aýmaǵynan tys jerde jazasyn ótkerip jatqan azamattarǵa, jazasyn óteý úshin Qazaqstanǵa berilgen azamattarǵa raqymshylyq qalaı jasalady? Bul raqymshylyq qaı elderdi jáne neshe adamdy qamtıdy? Shetelde jazasyn ótep jatqandarǵa raqymshylyq jasalǵan olardy elge qaıtarý qalaı júzege asady, — dep surady depýtat Ásel Rahmetova.
Abaı Qaıyrbekovtiń aıtýynsha, eldegi qylmystyq atqarý júıesi mekemelerinde 1000-nan astam shetel azamattary, shetelderde 1000-nan astam Qazaqstan azamattary jazasyn ótep jatyr.
— Onyń ishinde eń kóp sany, 800-den astamy Reseı Federatsııasynda. Olar basqa memlekette qylmys jasap, sol memlekettiń zańdarymen jazalanǵan. Atalǵan azamattardy berý máseleleri TMD-nyń Máskeý konventsııasy negizinde jasalady. Alys shetelmen ekijaqty halyqaralyq sharttar negizinde de júzege asyrylady. Ondaı sharttar 26 memleketpen bekitilgen. Byltyr 40-tan astam sottalýshy shet memleketterge berildi. Onyń kóbi Ózbekstan azamattary. Bıylǵy 5 aıdan 20-dan astam sheteldik óz elderine berildi. Olardyń da kóbi Ózbekstan azamattary. Atalǵan sheteldikter Qazaqstan Respýblıkasyna raqymshylyq qoldaný ótinishimen júginse, halyqaralyq sharttar negizinde ondaı quqyǵy bar, — dedi ol.
Sondaı-aq, ol shetelde jazasyn ótep jatqan Qazaqstan azamattaryna atalǵan raqymshylyq zań qoldanylmaıtynyn aıtty.
— Tek qana kelisimshart negizinde Qazaqstanǵa qaıtarylǵandarǵa qoldanylýy múmkin. Biraq ondaı jaǵdaı ekijaqty kelisimshartta qarastyrylǵan bolý kerek. Biz aldyn ala júrgizgen jumystar barysynda jasaǵan qylmystarynyń aýyrlyǵyna baılanysty raqymshylyqqa ilinbeıtini anyqtaldy, — dedi ІІM ókili.
Eske salsaq, ótken aptada Májilis «Konstıtýtsııasynyń 30 jyldyǵyna baılanysty raqymshylyq jasaý týraly» Zańdy qabyldap, senatqa joldaǵan bolatyn.