Raqymshylyq zańy: Qyzylordada 150-ge jýyq adam jazasyn óteýden bosatyldy

QYZYLORDA. KAZINFORM – Qyzylorda oblysy boıynsha qylmystyq atqarý júıesi departamentine qarasty túzeý mekemelerinde 1 466 adam jazasyn ótep jatyr. Sonyń 971-i jumysqa jaramdy.

Oblystyq prokýratýranyń málimetinshe, qaýipsizdigi barynsha tómen mekemeler men tergeý ızolıatorynda sottalǵandar túgel jumyspen qamtylǵan. Al qaýipsizdigi aralas mekemede bul kórsetkish – 52%. Sottalǵandardyń jumyspen qamtylý kórsetkishi respýblıkalyq deńgeıden (54%) joǵary – 75%.

- Júıeli jumys nátıjesinde №60 túzeý mekemesinde esepti merzimde qosymsha 5 jeke kásipker jańa jumys oryndaryn ashty. Jergilikti bıýdjet qarjysyna qosymsha modýldi jańa ǵımaraty salynyp jatyr. Sottalǵandarǵa arnalǵan kúndizgi statsıonar jumysyn bastady. Telemedıtsına iske qosylyp, jazasyn óteýshiler túgel skrınıngten ótti. №68 mekemeniń medıtsınalyq bóligindegi kúrdeli jóndeý jumysy qarashada aıaqtalady. Raqymshylyq qoldanylýy tıis 616 adamnyń 541-ne bul jeńildik qoldanyldy. 147-si jazasyn óteýden bosatylsa, 394-niń jaza merzimi qysqartyldy. 75 qujat sottyń qaraýynda, - delingen vedomstvo habarlamasynda.

Probatsııa esebindegi 80 adamǵa elektrondy baqylaý quraldary qoldanylyp, 8-i jaza óteý talaptaryn buzýyna baılanysty túzeý mekemelerine qaıta oraldy.

Buǵan deıin biz shilde aıynda Qyzylorda oblysy boıynsha qylmystyq atqarý júıesi departamentiniń qaýipsizdigi barynsha tómen №37 mekemesinen Konstıtýtsııanyń otyz jyldyǵyna baılanysty raqymshylyqqa ilikkender qatarynda alǵashqylardyń biri bolyp 3 adam bostandyqqa shyqqanyn jazǵanbyz.