Raqymshylyq: Abzal Quspan qosymsha 1700 adamdy bosatýǵa qatysty túsinik berdi

ASTANA. KAZINFORM — Májilis depýtaty Abzal Quspan raqymshylyq aıasynda bas bostandyǵynan aıyrý mekemelerinen bostandyqqa shyǵatyn adamdardyń sanyna qatysty túsinik berdi.

Atap aıtqanda, búgin Parlament Májilisiniń jalpy otyrysynda «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» Zańy qabyldandy.

Qylmystyq atqarý júıesi mekemelerinen shamamen 632 adam bostandyqqa shyǵady. 

Odan bólek, depýtattardyń usynysymen raqymshylyq aktisin júzege asyrý barysynda qylmystyq jazasyn óteýge sońǵy bir jyl qalǵan, oń minezdeletin 1 700-den astam sottalǵannyń bosap shyǵýy kózdelgen.

- 1700 adamǵa qatysty buǵan deıin aıtylmaǵan edi. Osy aptada tıisti usynysqa sheshim jasadyq. Jańaǵy bosap (632 adam) shyǵatyndardan bólek, ótelmegen merzimi bir jyl qalǵan 1700 sottalǵanǵa qatysty raqymshylyq aktisi qoldanylyp, olar bosap shyǵady. Bul rette, 632 adamǵa taǵy 1700 adamdy qosýǵa bolady. Osy oraıda eskere ketetin bir jaǵdaı bar, osy zań kúshine engennen keıin 632 adam birden bosatylsa, 1700 adam merzimi kelgen kezde bosap shyǵady. 6 aı boıy bul zań kúshinde bolady, ıaǵnı osy jarty jyl ishinde ýaqyty kelgender birtindep bosatylady, - dedi A.Quspan.

Bul turǵyda ol bas bostandyǵynan aıyrý mekemelerinde tártip buzbaǵandar iligetinin naqtylady.

Buǵan deıin bıyl raqymshylyq kimderge qoldanylatynyn jazǵan edik.