Raqymshylyq: Abaı oblysyndaǵy áıelder kolonııasynan 8 adam bosap shyqty
SEMEI. KAZINFORM — Abaı oblysynda Konstıtýtsııanyń 30 jyldyǵyna oraı 130-ǵa jýyq sottalǵan áıel raqymshylyqqa ilikti.
Óńirdegi áıelder kolonııasynda 400-ge jýyq áıel jazasyn ótep jatyr. Konstıtýtsııanyń 30 jyldyǵyna oraı jarııalanǵan raqymshylyq aıasynda 130-ǵa jýyq sottalǵan áıelge jeńildik qarastyrylǵan.
Abaı oblystyq QAJ departamentiniń málimetine súıensek, búgingi tańda 8 áıel bostandyqqa shyqty. Olardyń kóbisi ortasha aýyr qylmys jasaǵandar.
— Sonymen qatar kámeletke tolmaǵan balalary bar eki sottalǵanǵa jaza merziminiń ótelmegen bóligi úshten bir mólsherge qysqartyldy. Aldaǵy ýaqytta mekeme ákimshiliginiń usynystary qanaǵattandyrylǵan jaǵdaıda, basqa da sottalǵan áıelderge qatysty negizgi jaza merziminiń ótelmegen nemese oryndalmaǵan bóligi qysqartylýy múmkin, — deıdi departamenttiń arnaıy esep bóliminiń bastyǵy, ádilet podpolkovnıgi Svetlana Golıkova.
Bostandyqqa shyqqan áıelderdiń biri alaıaqtyq jasaǵany úshin 5 jylǵa sottalǵan bolatyn.
— Bul ýaqyt men úshin óte aýyr boldy. Osynda otyrǵan kezde úsh nemerem dúnıege keldi. Olardyń eshqaısysyn áli kórgen joqpyn. Іstegen isime qatty ókinemin. Jazamdy ótep jatqanda jaqyndaryma qoldaý kórsete almadym. Anam bıyl 93 jasqa toldy. Úıge, anama, balalarym men nemerelerime erte oralatynyma óte qýanyshtymyn, — deıdi ol.
Eske salsaq, osyǵan deıin ShQO-da raqymshylyq jasaý týraly zań aıasynda 44 adam túrmeden bosap shyǵatyndyǵy habarlanǵan.