Raısa Muhamedııarovany aqtyq saparǵa shyǵaryp salý rásimi 7 qarashada ótedi
ALMATY. QazAqparat - Almatylyqtar teatr jáne kıno aktrısasy Raısa Mýhamedııarovany 7 qarasha kúni aqtyq saparǵa shyǵaryp salady, dep habarlaıdy QazAqparat tilshisi.
Ǵabıt Músirepov atyndaǵy jasóspirimder teatry baspasóz qyzmetiniń habarlaýynsha, Keńes jáne qazaqstandyq kıno ári teatr aktrısasy, Qazaq SSR Eńbek sińirgen artısi, «Qurmet» ordeniniń ıegeri Raısa Muhamedııarovany aqtyq saparǵa shyǵaryp salý rásimi 7 qarasha kúni saǵat 10-00-da teatr ǵımaratynda ótedi.
Raısa Májıtqyzy Muhamedııarova 1939 jyly 11 shildede Semeı oblysy Kókpekti aýylynda dúnıege kelgen. Qazaq SSR jáne Qazaqstannyń eńbek sińirgen ártisi. Qazaq kınosy men teatr salasyna ólsheýsiz eńbek sińirgen aktrısa.
Raısa Muhamedııarova 1963 jyly rejısser Sultan Qojyqovtyń qazaq kınosynyń altyn qorynan oryn alǵan «Meniń atym - Qoja» fılminde ustaz Hadısha Maıqanovanyń rólimen halyqqa keńinen tanyldy. Kıno áleminde 30-ǵa jýyq fılmge túsken. Onyń talanty men sulýlyǵyn baǵalaǵan zamandas-áriptesteri «qazaqtyń Djına Lollobrıdjıdasy» dep ataǵan.
Aıta keteıik, 1964 jyly Raısa Muhamedııarova jazýshy Ǵabıt Músirepovke turmysqa shyǵyp, 8 jyl nekede bolǵan.
Aktrısa búgin 80 jasynda dúnıeden ozdy.
Foto: www.kino-teatr.ru
