Rahym Oshaqbaev: Óńirlerden vaktsına alýdy nasıhattaıtyn eriktilerdi tartýdamyz

ÓSKEMEN. QazAqparat – Elimizde koronavırýs pandemııasymen kúres jónindegi «El úshin egilemin» azamattyq shtabynyń músheleri Shyǵys Qazaqstan oblysyna keldi. Shtabtyń qurylýyna muryndyq bolǵandardyń biri Rahym Oshaqbaevtyń aıtýynsha, qazirgi ýaqytta óńirlerde vaktsına alýdy nasıhattaıtyn eriktiler tartylýda, dep habarlaıdy QazAqparat tilshisi.

«Qazaqstanda koronavırýs juqtyrý kórsetkishi kúrt ósip ketti. Osy aıda kún saıyn qaýipti dertke shaldyqqandar 7 myńnan asyp, emdelip jatqandar sany 118 myńǵa jýyqtap otyr. Bul ótken jyldyń tamyz aıymen salystyrǵanda 6 esege artyq. Sońǵy aptalarda elimizde kún saıyn 100-den astam adam vırýstan kóz jumýda», - deıdi ol.

Rahym Oshaqbaevtyń aıtýynsha, byltyr indetke qarsy turý úshin lokdaýn engizilgen bolatyn. Al osy jyly koronavırýsty jeńýdiń eń tıimdi ádisi – vaktsına paıda boldy.

«El úshin egilemin» azamattyq shtabynyń maqsaty – halyqqa vaktsına alýdy nasıhattaý, jalǵan aqparattarǵa senbeýge shaqyrý. Rasymende azamattardyń ekpe jaıly suraqtary jeterlik. Mine, biz dárigerler, túrli mamandar, sarapshylar arqyly sol saýaldardyń jaýabyn tabýǵa kómektesemiz. Búginde qatarymyzǵa óńirlerden eriktilerdi, belsendi jastar men medıtsına qyzmetkerlerin tartýdamyz. Nıet bildirgender bolsa qushaq jaıa qarsy alamyz. Іndetti birlesip jeńeıik!», - deıdi R. Oshaqbaev.