Rahym Oshaqbaev: Karantınnen keıingi tyǵyryqtan bizdi aýyl sharýashylyǵy alyp shyǵady
NUR-SULTAN. QazAqparat – «Talap» qoldanbaly zertteýler ortalyǵynyń dırektory Rahym Oshaqbaev nesıe beretin aýyl sharýashylyǵy salasyndaǵy uıymdardyń bárin bir qarjy uıymyna biriktirýdi usyndy, dep habarlaıdy QazAqparat tilshisi.
«Karantınnen keıin bizdi ekonomıkalyq tyǵyryqtan alyp shyǵatyn salalardyń biri – aýyl sharýashylyǵy. Alaıda bıýrokratııalyq protsedýralarǵa baılanysty qarjylandyrýǵa qatysty sheshimder kesheýildep qaldy. Bul baǵytta jumysty barynsha jedeldetý kerek», - dedi Rahym Oshaqbaev «Atameken» Ulttyq kásipkerler palatasynyń feısbýk-paraqshasynda onlaın rejımde sóılegen sózinde.
Sarapshynyń aıtýynsha, aýyl sharýashylyǵyn qarjylandyrý turǵysynda bank júıesine ǵana ıek artý múmkin emes.
«Bank bárine, ásirese shaǵyn jáne usaq bıznes ókilderine ýaqytynda aqshany jetkize almaıdy. Sol sebepti bul rette múlde jańa amal-ádis kerek. Qazirgi daǵdarystyń teńdessiz sıpaty bar. Tipti bálkim, qazir elde Agrobank ashýǵa deıingi qadamdarǵa barǵan jón bolar. Nesıe beretin aýyl sharýashylyǵy salasyndaǵy uıymdardyń bárin bir qarjy uıymyna biriktirip, sol arqyly kásipkerlerdi tómen paıyzdyq nesıemen qoldaǵan jón. Kepildik qaldyrý tártibinen ketip, naqty bıznes-josparlarǵa qarajat aýdarý kerek», - dedi ol.
Rahym Oshaqbaev bul turǵyda Qytaıdyń tájirıbesin mysalǵa keltirdi. Onyń aıtýynsha ondaǵy fermerlerge berilýi tıis qarajat qoljetimdi bolǵan.
«Ol jaqta óte tómen paıyzben, kepilsiz ártúrli salany, onyń ishinde aýyl sharýashylyǵyn nesıemen qoldaǵan memlekettik bankter boldy. Meniń oıymsha bizge de dál qazir osy tájirıbe kerek», - dep túıdi ol.
Eske sala ketsek QR Prezıdenti Qasym-Jomart Toqaev tótenshe jaǵdaı rejımin bıylǵy 11 mamyrǵa deıin uzartý jóninde sheshim qabyldady. Bul týraly Memleket basshysy búgingi málimdemesinde aıtqan bolatyn.
