Rahym Oshaqbaev elimizde ÚEU-lar atqaratyn mindetterge pikir bildirdi
«Búgin úkimettik emes uıymdardyń ókilderi ózderiniń kásibı merekesin atap ótip jatyr. Jalpy, Qazaqstanda birazdan beri úkimettik emes uıymdardy yntalandyrý boıynsha maǵynaly ári tıimdi saıasat iske asyrylyp keledi. Qazaqstan Azamattyq alıansy túrinde ınstıtýtsıonaldy orta bar. Jalpy, bul salada tıisti qarjy bólinip, granttyq tetik jetildirilip jatyr. Osynyń nátıjesinde aýqymdy túrde óńirlerge taralǵan azamattyq qoǵam sektoryn kórip otyrmyz. Olar qoǵamdyq-saıası ómirge, zańnamany jetildirýge, áleýmettik problemalardy sheshýge qatysty óziniń eleýli úlesin qosyp keledi», - dedi R. Oshaqbaev Aqparat jáne qoǵamdyq damý mınıstriniń úkimettik emes uıym ókilderimen kezdesýinen keıin.
Sonymen qatar ol búgin mınıstrmen kezdesý barysynda ÚEU ókilderi qaı máselelerdi kótergenin aıtty.
R. Oshaqbaevtyń aıtýynsha, bıyl Azamattyq forým ótýi tıis.
«Kezdesýde dástúrli ári otbasylyq qundylyqtarǵa erekshe mán berildi. Sonymen qatar, úkimettik emes uıym róli óńirlerde, aýyldyq jerlerdegi adamdardy qoldaýǵa jáne bilim berý salasyna baǵyttalýy kerektigi aıtyldy. Biz osy jyly aýqymdy Azamattyq forým ótedi dep úmittenemiz. Onda ÚEU-lar júrgizgen eleýli jumysqa qorytyndy jasap, bolashaqqa josparlardy belgileımiz», - dedi ol.
Aıta keteıik, búgin Aqparat jáne qoǵamdyq damý mınıstri Aıda Balaeva úkimettik emes uıym ókilderimen kezdesti. Іs-shara jyl saıyn 27 aqpanda atap ótiletin Dúnıejúzilik úkimettik emes uıymdar kúni aıasynda ótti.
