Rahym Oshaqbaev: Ekologııa kodeksiniń qabyldanýy – qorshaǵan ortany qorǵaý salasyndaǵy mańyzdy meje

NUR-SULTAN. QazAqparat - Qazaqstannyń ekologııalyq zańnamasynyń damýynda úlken, «tıtandyq» pozıtıv qozǵalys oryn aldy. «Talap» qoldanbaly zertteýler ortalyǵynyń dırektory Rahym Oshaqbaev osyndaı pikirde, dep habarlaıdy QazAqparat.

Onyń sózinshe, búgin QR Prezıdenti qol qoıǵan kodeksti daıyndaý týraly áńgime kópten beri aıtylyp kele jatyr. Sansyz talqylaýlar bolyp, birazyna Oshaqbaevtyń ózi de moderator retinde tartylǵan.

«Kodekste úlken úmit kútiletin novellalar bar. Bárinen buryn Ekokodeks ıdeologııasy kútpegen jaǵdaı jáne teńdessiz oqıǵa ekenine nazar aýdarý kerek. Onyń ishinde qorshaǵan ortany lastaý tólemderiniń ornyna Eń ozyq qoljetimdi tehnologııalardy engizý mehanızminiń qoldanylýyn erekshe atap óter edim. Bul, árıne, bir jaǵynan bıýdjetke biraz qarjynyń túspeı qalýyna ákep soqtyrady. Degenmen, kompanııalardy qaldyqtardy azaıtý úshin tehnologııalyq jabdyqtandyrý deńgeıin joǵarylatýǵa yntalandyrady. Sondyqtan Ekologııalyq kodekstiń ıdeologııasy júzege asý kezinde qısyndy ári oryndy ekenin kórsetetinine úmittenemiz»,- dedi Rahym Oshaqbaev.

Ol sonymen birge Ekokodeks qabyldanǵannan keıin EOQT-nyń anyqtamalyǵyn bekitýge nazar aýdarý qajettigin, Ekologııa mınıstrligi engizgen stımýldardyń is júzinde júzege asyp jatqanyna kóz jetkizý úshin ınvestıtsııalyq protsesterdi baqylap otyrý kerektigin atap ótti.

«Kompanııalar EOQT-dy 2025 jyldan bastap engizýge tıis ekeni belgili. Degenmen biz 2021-2022 jyldardyń ózinde birqatar iri kásiporyndar EOQT-ǵa ınvestıtsııa salyp jatqandaryn habarlaıdy dep úmittenemiz»,- dep aıtty sarapshy.

Rahym Oshaqbaev atmosferalyq aýany sapaly baqylaýdyń mańyzdylyǵyna, ol aqparattyń túsinikti, qoljetimdi túrde usynylýy qajettigine de nazar aýdardy.

Mysal retinde sarapshy túsinikti shkalamen 6-7 lastaýshy zattardyń kórsetkishi negizinde jasalatyn Air Quality Index aýa sapasy ındeksin keltirip otyr.

«Osylaısha ekologııalyq zańnamanyń ári qaraıǵy damýy atmosferalyq aýa sapasy týraly tolyqqandy aqparattyń berilýine septigin tıgizedi dep senemiz. Sol kezde túrli ǵylymı ınstıtýttar, zertteý ortalyqtary atmosferalyq aýanyń lastaný modelderin jasap, shyǵaryndylardy azaıtýǵa baılanysty ǵylymı negizdelgen sheshimder usyna alady», - dep túıdi sózin R.Oshaqbaev.