Rahmanberdi Abdrashıt belbeý kúresinen álem chempıony
QYZYLORDA. QazAqparat - Jańaqorǵandyq jas palýan Rahmanberdi Abdrashıt Reseıdiń Qazan qalasynda Belbeý kúresinen ótken álem chempıonatynda 65 keli salmaqta qarsylas shaq keltirmeı, altyn medaldi ıelendi.
Álemniń 22 memleketinen kelgen kil balýandardyń beldesýinde Rahmanberdi aqtyq synda reseılik sportshynyń jaýyrynyn jer ıisketip, jeńis tuǵyrynan kórindi. Bul týraly Jańaqorǵan aýdandyq ákimdiginiń baspasóz qyzmeti habarlady.
Elimizden barǵan 10-ǵa jýyq sportshynyń arasynan jalǵyz altyndy ıelengen Rahmanberdi Táýelsizdik kúnine tamasha tartý jasady. Óıtkeni, bul dúbirli doda jeltoqsan aıynyń 13-16 kúni aralyǵynda ótken bolatyn. Aıta keteıik, Rahmanberdi Abdrashıt búgingi tańda oblys ortalyǵyndaǵy Abylaı han atyndaǵy kolledjdiń 1-kýrs stýdenti. Onyń alǵashqy bapkeri E.Isabaev ta shákirtiniń jeńispen oralatyndyǵyna senimdi bolǵanyn aıtady. Rahmanberdi qazirgi tańda Qyzylorda qalasyndaǵy bapkeri B.Qasymbekovtyń jetekshiliginde jattyǵýda.
