Rahman Omarovtyń uly anasynyń múrdesin qalaı taýyp alǵanyn aıtty

Búgin Almaty mamandandyrylǵan aýdanaralyq sotynda jantúrshigerlik qylmysqa qatysty aldyn ala sot tyńdalymy ótti.

Sot aldynda kúdikti 30 jastaǵy Aqtolqyn Súleımenova jaýap berip jatyr.

Oǵan QR QK 99-babynyń 1-bólimi, 99-baby 2-bóliminiń 10, 13 tarmaqshalarymen, 24-babynyń 3-bólimimen aıyp taǵylyp otyr.

Sot otyrysynan soń marqumnyń uly Doshan Kákimov qaıǵyly oqıǵa jaıly  tolyq aıtyp berdi.

«Men anamdy keshki 18:00 shamasynda izdep bardym. Esikti 7 mınýttaı, ıaǵnı uzaq qaqtym. Eshkim ashpady. Basqa jaqqa ketken bolar degen oımen  kete bergenimde esiktiń kózinen kóleńkeni baıqadym. Sol sátte men esikti tepkileı bastadym. Búkil kórshiler estidi. Áıel esikti ashty, biraq anań ketip qaldy dep meni kirgizgisi kelmedi. Men «óz úıime nege kirgizgisi kelmeı jatyr» degen kúdikpen kúshtep ishke kirdim. Birinshi bólmeden ekinshi bólmege ótkende bir qyzdyń uıyqtap jatqanyn kórdim. Úshinshi bólmege kirem degende, Súleımenova (aıyptalýshy) meni kirgizgisi kelmedi. Men kirip baryp, anamnyń máıitin kórdim. Sol sátte Súleımenova maǵan pyshaqpen atyldy. Basynda pyshaǵy baryn bilmedim. Ol artyna  tyǵyp keldi me eken, áıteýir baıqamadym. Maǵan shabýyldaı bastaǵanda oń jaq betinen shapalaqpen urdym. Ol maǵan umtyla berdi. Men ary qaraı qorǵanyp, onyń qoly astynan júgirip shyqtym. Esikti qulyptap qoıǵan. Áýpirimdep ashyp, polıtsııa men jedel járdem shaqyrdym», - dedi Doshan Kákimov.


Marqum Gúlderaıym Omarovanyń uly  qylmys kezinde úıde bolǵan ekinshi qyzdyń jaýapkershilikke nege tartylmaǵanyn túsindirdi. «Qylmys kezinde taǵaıyndalǵan  genomdy saraptama nátıjesinde ekinshi qyzdyń saýsaq izi, basqa da izderi tabylmaǵan», - dedi D.Kákimov. 

Jas jigit sondaı-aq, Súleımenovanyń qorǵaýshysynyń keltirgen ótinishimen kelispeıtinin aıtty.

«Olar meni óltirgisi kelgen joq dep jatyr. Biraq, Súleımenova maǵan pyshaq ala júgirdi. Ol meni óltirip, osy qylmysty túp-tamyrymen jaýyp tastaǵysy keldi. Súleımenova meniń anama 8 jerinen pyshaq salǵan. Ol anamdy óltirgisi kelmese, sonsha jerinen pyshaq salmaıtyn edi», - dedi Rahman Omarovtyń uly.

Aıta ketý kerek, búgin aldyn ala sot tyńdalymy ótti. 

Onda Súleımenovanyń qorǵaýshysy qorǵaýyndaǵy áıeldiń Doshandy óltirgisi kelmegenin, GÚlderaıymdy baıqaýsyzda óltirip alǵanyn aıtyp, ótinish túsirgen bolatyn.

Advokat QR QK 99-babynyń 1-bólimin QR QK 106 babyna (adam densaýlyǵyna qasaqana zalal keltirý) aýystyrýdy surady.

Alaıda sot onyń ótinishin qanaǵattandyrmady. Basty sot talqylaýy 5 qarashada 15:00-ge belgilendi.