Rahman Omarov pen Marjan Arapbaeva «Eki juldyz» teledýmanynyń jeńimpazdary atandy
ALMATY. Maýsymnyń 14-i. QazAqparat /Názıra Eleýhan/ - Almatyda «Eki juldyz» teledýmany máresine jetip, aqtyq baıqaýda jeńimpazdar anyqtaldy.
San myńdaǵan kórermenniń kózaıymyna aınalǵan baǵdarlama naýryz aıynyń 13-de bastalǵan bolatyn. Ekinshi maýsymnyń jeńimpazdary bıyl da qazylar alqasy men kórermenderdiń bergen daýystarynyń nátıjesinde belgili boldy. Ol jeńimpaz juldyzdy jup - belgili akter, telejúrgizýshi, Rahman Omarov pen tanymal ánshi Marjan Arapbaeva.
Jeńimpazdardy quttyqtaý rásimde sóz sóılegen telearnanyń basqarma tóraǵasy Janaı Omarov: «Bárimiz búginde halyqtyń kóńilinen shyqqan baǵdarlamany, búkil halyqtyq saýyqtyq dýmanǵa aınalǵan keremet án merekesin 4 aı boıy tamashaladyq. Menińshe, osy jobaǵa qatysqan 16 juptyń barlyǵy jeńimpaz dep atanýǵa laıyq. Jobada eshkim jeńilgen joq. Sondyqtan, «Eki juldyz» jobasynyń barlyq jeńimpazdaryn shyn júrekten quttyqtaımyn. Jobaǵa atsalysqan uıymdastyrýshylar men ádilqazylar alqasyna alǵysymdy aıtamyn. Búgin joba shymyldyǵyn japsa da, barshańyzǵa Eki juldyz «qosh» dep aıtpaıdy, kúzgi úshinshi maýsymdaǵy jobada júzdeskenshe deıdi, qymbatty dostar», dedi.
Onyń aıtýynsha, «Eki juldyz» jobasynyń eń basty nátıjesi - ol elimizde juldyzdardy qalyptastyrý ınstıtýtyna aınalyp, óz úlesin qosýynda, sondaı-aq jobanyń jańa kásibı, joǵary deńgeıge kóterilip, halyqtyń kóńilinen shyǵyp, halyqtyq saýyq-dýmanǵa aınalǵandyǵynda.
Barlyq qatysýshylar arnaıy estelik sertıfıkattarmen jáne baǵaly syılyqtarmen marapattaldy.
