Rahman Omarov áıeliniń ólimi: Kúdikti marqumnyń ózin balaǵattaǵanyn aıtty
ALMATY. QazAqparat - Almatydaǵy qylmystyq ister boıynsha mamandandyrylǵan aýdandyq sotta Rahman Omarovtyń birinshi áıeli Gúlderaıym Omarovanyń ólimine qatysty sot otyrysy jalǵasyp jatyr. Búgingi otyrysta sottalýshy Aqtolqyn Súleımenova óz oıyn aıtýy kerek bolatyn. Alaıda ol bas tartqan soń sýdıa sottalýshynyń tergeý barysynda bergen túsiniktemelerin oqytty, dep habarlaıdy QazAqparat tilshisi sot zalynan.
Sottalýshynyń sózin qorǵaýshysy Ýmarov oqyp berdi.
«Men ózime QR QK 99-baby, 1-bólimimen taǵylǵan aıypty moıyndamaımyn. Sebebi, adam óltiremin degen nıetim bolmady. Ol (Gúlderaıym) ózi «aýyldan kelgender, túk kórmegender» dep bizdi balaǵattaı bastady. Sosyn shapalaqpen salyp qaldy. Sosyn men de ony urdym. Pyshaqpen ózime birinshi umtyldy. Sosyn pyshaqty tartyp alyp, moınynan salyp qalǵanym esimde. Neshe ret urǵanymdy bilmeımin. Esimdi jısam, ol jantásilim etipti. Sol kúni jas jigit (Gúlderaıymnyń uly Doshan) kelip, anasyn izdep júrgenin aıtty. Men oǵan anasynyń meni birinshi urǵanyn túsindire bastap edim, ol jigit meniń ózime atyldy. Ózimdi qorǵaýǵa tyrystym. Sosyn álgi jigit balkonnan anasynyń aıaǵyn kórip qaldy. Sosyn men ózim de úshinshi qabattan asylyp ólgim keldi», - dedi sottalýshynyń sózin oqyǵan qorǵaýshy Ýmarov.
Aıta ketý kerek, sottalýshy buryn da QR QK 188-babymen («Tonaý, urlyq») isti bolǵan eken.
Sondaı-aq, sýdıa sottalýshynyń munyń aldynda bergen túsiniktemelerin de oqytty. Belgili bolǵandaı, Aqtolqyn Súleımenova buryn óziniń túsiniktemelerin birneshe ret ózgertken. Eń alǵashynda ol Gúlderaıymdy páter jaldaýǵa kelgen Uljan degen qyz óltirgenin aıtqan. Onyń aldyńǵy túsiniktemesin memlekettik aıyptaýshy oqyp berdi.
«Men jarty jyl buryn ózimniń qurbylarymnyń qasyna jaldamaly páterge kóship keldim. Páteraqysyn ózara bólip tóleıtin boldyq. Páter aqysyn alýǵa ylǵı páter ıesi Gúlderaıym Omarova keletin. 25 maýsymda tańerteń qyzdardyń bári jumysqa ketkende, Uljan syrttan keldi. Páterde ekeýmiz ǵana boldyq. Shamamen 15 mınýttan soń Gúlderaıym keldi. Bir ýaqytta ol as úıdegi synyp qalǵan oryndyqtardy jeleý etip, urys shyǵardy. Sosyn men de jaýap qaıtaryp, ursysa bastadym. Biz munda kóship kelgende dıvan da synyq bolǵanyn aıttym. Azdan soń ájethanada otyrǵanymda gúrs etken dybys estidim. Shyqqan kezde jerde jatqan páter ıesi men onyń qasynda turǵan Uljandy kórdim», - dedi prokýror tergeý kezindegi túsiniktemelerdi oqı otyryp.
Bul túsiniktemeni bergende sottalýshy jansaqtaý bóliminde jatqan. Qaıǵyly oqıǵa bolǵan jerge jedel jetken polıtsııa qyzmetkerleri ony 3-qabattyń balkonynda asylyp turǵan jerinen qutqaryp qalǵan.
Aıta keteıik, qaıǵyly oqıǵa 2018 jyldyń maýsymynda bolǵan edi. Gúlderaıym Omarova «Aqkent» shaǵynaýdanyndaǵy páterin jalǵa berip kelgen. 26 maýsym kúni ol páteraqyny alý úshin jaldaýshylaryna barǵan. Sol kezde páter qojaıyny men jaldaýshylar arasynda kıkiljiń týǵan. Daý-damaıdyń arty qaıǵyly jaǵdaıǵa ulasqan. Eki áıel Gúlderaıymǵa birneshe jerinen pyshaq salǵan. Áıel sol jerde alǵan jaraqatynan kóz jumdy.
