Rahman qaınaryna jetý qıyndaıdy: ShQO-da jóndeý jumystaryna baılanysty qozǵalys shekteldi
ÓSKEMEN. KAZINFORM — Jaz kezinde Rahman qaınaryna barýdy josparlaǵan turǵyndar men týrıster ýaqytsha engizilgen shekteýlerdi eskergeni jón. Shyǵys Qazaqstan oblysynda Katonqaraǵaı men Rahman qaınary arasyndaǵy jol ýchaskesinde asfaltbeton jabyndysyn tóseý jumystary bastaldy.
Respýblıkalyq mańyzy bar Óskemen — Altaı — Úlken Naryn — Katonqaraǵaı — Rahman qaınary avtokólik jolynyń 437-450 shaqyrym aralyǵynda 8 maýsymnan bastap kún saıyn saǵat 06:00–den 18:00–ge deıin kólik qozǵalysyna shekteý qoıyldy.
«QazAvtoJol» UK» AQ Shyǵys Qazaqstan oblystyq fılıalynyń habarlaýynsha, bul sheshim joldy jańǵyrtýdyń mańyzdy kezeńi — asfaltbeton jabyndysyn tóseý jumystarynyń bastalýyna baılanysty qabyldanǵan. Óńirdegi eń tanymal týrıstik oryndardyń birine aparatyn bul jol alǵash ret tolyqtaı asfalttalmaq.
— Ýchaskede iri jol-qurylys tehnıkasyn paıdalana otyryp, asfaltbeton jabyndysyn tóseý jumystary bastaldy. Mundaı jumystardy kólik qozǵalysyn toqtatpaı júrgizý júrgizýshiler úshin qaýipti. Sonymen qatar bul bolashaq jol jabynynyń sapasyna keri áserin tıgizýi múmkin, — dedi «QazAvtoJol» UK» AQ Shyǵys Qazaqstan oblystyq fılıaly dırektorynyń orynbasary Ádilet Jampeıisov.
Onyń aıtýynsha, merdiger uıymdar asfalt tóseýmen qatar sý ótkizý qurylystaryn ornatý, jol tóseminiń negizin daıyndaý, temirbeton naýalaryn salý jáne kóshkin qaýpi bar ýchaskelerdi nyǵaıtý jumystaryn da jalǵastyryp jatyr.
Qaýipsizdik máselesine erekshe kóńil bólinip otyr. Jol taýly aımaq arqyly ótetindikten, qurylys kezinde tas qulaý jáne topyraqtyń opyrylý qaýpi saqtalady.
— Bul ýchaske kúrdeli taýly jerde ornalasqan. Qurylys jumystary júrip jatqan aýmaqta bógde adamdar men kólikterdiń bolýy olardyń ómiri men densaýlyǵyna qaýip tóndirýi múmkin. Sondyqtan qozǵalysqa ýaqytsha shekteý qoıý májbúrli shara, — dedi Ádilet Jampeıisov.
Shekteýler jol tósemi men asfaltbeton jabyndysyn tóseý boıynsha negizgi jumystar aıaqtalǵanǵa deıin saqtalady. Nysandy osy jyldyń sońyna deıin paıdalanýǵa berý josparlanyp otyr.
Eske salsaq, osyǵan deıin Úkimet otyrysynda kóterilgen týrızm salasyndaǵy negizgi túıtkilder týraly jazǵan bolatynbyz.
