Rahman qaınaryna aparatyn joldaǵy jóndeý jumystaryna kedergi keltirý jaǵdaıy jıiledi
ASTANA.KAZINFORM – «QazAvtoJol» UK» AQ Shyǵys Qazaqstan oblysynyń turǵyndary men qonaqtaryn Qazaqstannyń basty týrıstik oryndarynyń biri – Rahman qaınaryna aparatyn joldy salyp jatqan mamandardyń eńbegine túsinistikpen jáne qurmetpen qaraýǵa shaqyrdy.
Qazirgi ýaqytta Óskemen – Altaı – Úlken Naryn – Katonqaraǵaı – Rahman qaınary avtomobıl jolynda aýqymdy qurylys-jóndeý jumystary jalǵasyp jatyr. Joba aıaqtalǵannan keıin tanymal týrıstik baǵytqa qatynaý qaýipsiz, jyldam ári jaıly bola túsedi. Asfaltbeton jabynyn tóseý kezinde jol jumysshylary men qozǵalysqa qatysýshylardyń qaýipsizdigin qamtamasyz etý maqsatynda kún saıyn saǵat 06:00-den 18:00-ge deıin kólik qozǵalysyna ýaqytsha shekteý engizilgen. Týrıstik maýsymnyń qyzǵanyn jáne turǵyndardyń ótinishterin eskere otyryp, kólik quraldaryn ótkizý úshin saǵat 12:00-den 13:00-ge deıin qosymsha ýaqyt belgilendi.
Bul shekteýler qarqyndy jol jumystarynyń júrgizilýine jáne tar taýly ýchaskedegi qaýipsizdikti qamtamasyz etý qajettiligine baılanysty engizildi. Ókinishke qaraı, sońǵy kúnderi jumys júrgizilip jatqan jerde keıbir demalýshylar tarapynan agressıvti áreketter jıilegen. Jol qyzmetkerlerin qorlaý, qoqan-loqy kórsetý, arnaıy tehnıkanyń jumysyna kedergi keltirý jáne qozǵalys qaýipsizdigin qamtamasyz etetin qyzmetkerlerge kúsh qoldaný faktileri tirkeldi.
– Mundaı áreketterge jol berýge bolmaıdy. Jolda eńbek etip júrgen mamandar kúrdeli jaǵdaıda jumys istep jatyr. Olardyń maqsaty – myńdaǵan týrıstiń Rahman qaınaryna qaýipsiz ári jaıly jetýine jaǵdaı jasaý. Janjal shyǵarý, tehnıkanyń jolyn bógeý jáne belgilengen qozǵalys tártibin saqtamaý jóndeý jumystarynyń merzimine tikeleı áser etedi. Jol qyzmetteriniń jumysyna kedergi kóbeıgen saıyn ýaqytsha shekteýler de uzaq saqtalady. Kompanııa ár azamattyń tabıǵat aıasynda demalýǵa degen nıetin túsinedi. Jaz – týrıstik qozǵalys eń joǵary bolatyn kezeń. Osyǵan baılanysty jol qyzmetteri demalýshylarǵa qolaıly jaǵdaı jasaý úshin kúndizgi ýaqytta qosymsha ótý múmkindigin uıymdastyrdy. Barsha jol qozǵalysyna qatysýshylardan belgilengen tártipti saqtaýdy, jumysshylardyń talaptaryna túsinistikpen qaraýdy jáne ózara qurmet tanytýdy suraımyz, - delingen habarlamada.
Eske sala keteıik, kúsh qoldaný, qorqytý, qorlaý, qyzmetkerlerdiń zańdy jumysyna jáne jol qurylysyna kedergi keltirý Qazaqstan Respýblıkasynyń zańnamasyna sáıkes jaýapkershilikke ákep soǵady.
«QazAvtoJol» UK» AQ barshany sabyrlylyq, ózara qurmet jáne azamattyq jaýapkershilik tanytýǵa shaqyrdy. Búgingi ýaqytsha qolaısyzdyq – erteń Qazaqstannyń eń kórikti jerleriniń birine aparatyn zamanaýı, qaýipsiz ári sapaly joldyń kepili.
Buǵan deıin aqyly avtomobıl joldaryn kimder tegin paıdalana alatynyn jazǵan edik.
