Rahman qaınaryna aparatyn jol eki saǵatqa qysqardy
ÓSKEMEN. KAZINFORM – Memleket basshysynyń tapsyrmasyn oryndaý aıasynda «QazAvtoJol» UK» AQ respýblıkalyq mańyzy bar «Óskemen – Altaı – Úlken Naryn – Katonqaraǵaı – Rahman qaınary» avtojolynyń 437–450 shaqyrymynda negizgi jumystardy aıaqtady. Uzyndyǵy 13 shaqyrym jańartylǵan ýchaskede kólik qozǵalysy ashyldy.
Bul joba Shyǵys Qazaqstandaǵy basty týrıstik baǵyttardyń birin kezeń-kezeńimen jańǵyrtý jumysynyń bir bóligi. Óskemennen Rahman qaınaryna deıingi avtojoldyń jalpy uzyndyǵy shamamen 450 shaqyrym. Júrgizilgen jóndeýdiń nátıjesinde sapar qaýipsiz ári qolaıly bola tústi, al jol júrý ýaqyty shamamen eki saǵatqa qysqardy.
Bul baǵyt Katonqaraǵaı aýdany men óńir týrızminiń órkendeýi úshin aıryqsha mańyzǵa ıe. Avtojol Rahman qaınaryna, Katonqaraǵaı ulttyq parkine jáne Altaıdyń ózge de tabıǵı kórikti jerlerine aparady. Jol jaǵdaıynyń jaqsarýy týrıster sanyn arttyrýǵa, shaǵyn jáne orta bıznestiń, jol boıyndaǵy servıstiń jáne týrıstik ınfraqurylymnyń órkendeýine jańa múmkindik beredi.
Joldyń resmı ashylýyna «QazAvtoJol» UK» AQ Basqarma tóraǵasy Darhan Imanashev, Shyǵys Qazaqstan oblysynyń ákimi Nurymbet Saqtaǵanov, jol salasynyń ókilderi jáne jergilikti turǵyndar qatysty.
– Katonqaraǵaı úshin sapaly jol – týrızmniń, óńir ekonomıkasynyń jáne jergilikti halyqtyń turmys sapasynyń mańyzdy negizi. Búgingi másele jekelegen shaqyrymdardy jóndeýmen ǵana shektelmeıdi. Biz Óskemennen Rahman qaınarlaryna deıin qaýipsiz ári qolaıly jol qalyptastyryp kelemiz. Atqarylǵan jumystar sapar ýaqytyn shamamen eki saǵatqa qysqartýǵa múmkindik berdi. Kelesi mańyzdy kezeń – Osınov asýyndaǵy nysandy aıaqtaý. Ony bıyl qazan aıynyń sońynda ashýdy josparlap otyrmyz. Bul jobalar Katonqaraǵaıǵa qatynasty edáýir jaqsartyp, óńirdiń damýyna jańa múmkindik beredi, – dedi «QazAvtoJol» UK» AQ Basqarma tóraǵasy Darhan Imanashev.
437-450 shaqyrym aralyǵyndaǵy ortasha jóndeý 2025 jyly bastalyp, 2026 jyly aıaqtaldy. 13 shaqyrym boıynda joldyń boılyq jáne kóldeneń pishini túzetilip, qara qıyrshyqtas qabaty men jol jamylǵysynyń ústińgi qabaty tóseldi.
Joba aıasynda 17 sý ótkizý qubyry men úsh sý ótkizý naýasy salyndy. Sondaı-aq sý burý arnalary jasalyp, joldy jabdyqtaý jumystary atqaryldy.
Nysanǵa 65 maman men 36-ǵa jýyq jol-qurylys tehnıkasy jumyldyryldy.
Bıyl «Óskemen – Altaı – Úlken Naryn – Katonqaraǵaı – Rahman qaınary» avtojolynyń birneshe bóliginde jóndeý júrgizilýde. Joldy kezeń-kezeńimen jańartý qozǵalys qaýipsizdigin arttyryp, Shyǵys Qazaqstandaǵy mańyzdy týrıstik aımaqqa qatynasty jaqsartýǵa baǵyttalǵan.
Bul baǵyttyń damýyna Osınov asýyn aınalyp ótetin jańa joldyń aıaqtalýy da serpin beredi. Qazir nysandaǵy kópir qurylysynyń sońǵy jumystary júrgizilýde. Kólik qozǵalysyn 2026 jylǵy qazan aıynyń sońynda ashý josparlanǵan.
Jańa jol kúrdeli taýly bólikti aınalyp ótýge múmkindik berip, kólik qatynasynyń senimdiligin arttyrady. Munyń ásirese qys mezgilinde mańyzy zor. Óıtkeni Osınov asýynda qalyń qar, kóktaıǵaq jáne qolaısyz aýa raıy qozǵalysty jıi qıyndatady. Jańa nysan iske qosylǵannan keıin júrgizýshiler úshin qaýipsiz ári turaqty qozǵalys qamtamasyz etiledi.
Osylaısha, oblys ortalyǵynan Shyǵys Qazaqstannyń basty týrıstik aımaqtarynyń birine deıingi sapaly ári qaýipsiz avtojol kezeń-kezeńimen qalyptasyp keledi.
Rahman qaınaryna aparatyn joldyń jańarýy jáne Osınov asýyndaǵy jańa nysannyń aıaqtalýy Katonqaraǵaı týrızminiń damýyna, týrıster aǵynynyń artýyna jáne Shyǵys Qazaqstandaǵy kólik qatynasynyń jaqsarýyna berik ınfraqurylymdyq negiz qalaıdy.
Aıta keteıik, buǵan deıin Osınov asýyn aınalyp ótetin uzyndyǵy 12 shaqyrymǵa jýyq jańa joldyń qurylysy aıaqtalýǵa taıaǵany habarlanǵan. Jańa baǵyt qazirgi joldy qysqartyp, ásirese qys mezgilinde Katonqaraǵaıǵa qatynasty qaýipsiz etýge múmkindik beredi.
