Rahman Alshanov hosteldegi órt týraly: Almatyda 40 myń stýdent dalada júr

Qazaqstan Joǵary oqý oryndary qaýymdastyǵynyń prezıdenti Rahman Alshanov elordada búgin ótken «Ýnıversıtetterdiń jańa modeli» atty ulttyq rektorlar mektebiniń jıynynda Almaty hostelindegi órt týraly pikir bildirdi, dep habarlaıdy Kazinform.

«Ótkende úlken jınalysta da aıttym. Qarasańyz, Nazarbaev Ýnıversıtetiniń bıýdjetin buǵan deıin eshkim bilgen joq. Ótkende aıtylyp qaldy. Bir ǵana sol ýnıversıtettiń bıýdjeti Qazaqstandaǵy búkil ýnıversıtetterdiń qarajatynan artyq bop tur. Árıne, joǵary bilimdi damytý kerek boldy. Biraq qashanǵy osylaı bola beredi?! Búgingi tańda memleket áli olarǵa bıýdjetten kómektesip otyr. Sonda ketken aqshanyń jartysyn únemdeıtin bolsa, qalaı bolar edi? Olardyń ýáji bar, Garvardta qanshama balany oqytqansha óz elimizde sol jaqtyń ǵalymdaryn shaqyrtyp oqytamyz, sol arqyly aqsha únemdeımiz degendi aıtady. Nazarbaev Ýnıversıtetiniń bıýdjetin bir stýdentke shaqqan kezde 240 myń dollar eken. Al Garvardta 40 myń dollar ǵana. Bizde 6 ese joǵary. Sonda biz Garvardtan 6 ese kóp maman daıyndap jatyrmyz ba? Aqshanyń bári qaıda ketip jatyr? Tekseretin organdar sony teksersin», – deıdi ǵalym.

Aıtýynsha, bir jataqhana salýǵa 2 mlrd teńge ketedi.

«Nazarbaev Ýnıversıtetiniń jyldyq bıýdjetiniń jartysyn únemdeıtin bolsa, 100 jataqhana salýǵa bolatyn edi. Al 100 jataqhana degen 5 myń stýdenttiń panasy. Sonda keshegi hosteldegideı oqıǵa bolmaıtyn edi. Almatyda qazir 40 myń bala dalada júr. Amalsyzdan hostelge barady. «Kerek, kerek», - dep sanıtarııalyq normany, talaptardy tómendettik. Sonyń saldarynan osyndaı jaǵdaı boldy», – dedi qaýymdastyq prezıdenti.