Rahat Jaqsybaı: «Nur-Sultan Ethno Fest» ótkizýdegi maqsat - salt-dástúrlerimizdi jańǵyrtý

QazAqparat tilshisine atalmysh shara týraly QR Ulttyq sport qaýymdastyǵynyń atqarýshy dırektory Rahat Jaqsybaı aıtyp bergen edi.

- «Nur-Sultan Ethno Fest» merekesin ótkizýgene túrtki boldy, qysqasha toqtalyp ótseńiz?

- Tuńǵysh ret «Nur-Sultan Ethno Fest» merekesin ótkizýdegi basty maqsatymyz atalmysh is-shara aıasynda umytyla bastaǵan salt-dástúrlerimiz qaıta jańǵyryp, ár túrli ulttyq oıyndarymyzdy nasıhattaý boldy.

- Umytyla bastaǵan salt-dástúrlerimizge baılanysty naqtyly qandaı sharalar uıymdastyrylady?

- Ultymyzdyń, ıaǵnı qazaq halqynyń umytyla bastaǵan dástúrleri óte kóp. Mysalǵa alyp aıtar bolsaq, qamshygerlik, tezge salý, qolqa salý, tyǵyryqqa tireý, arqan órý, qamshy órý, shańyraq kóterý sekildi ulttyq salt-dástúrlerdi búgingi urpaqtyń biri bilse, biri bile bermeıdi. Biz osy maqsatta mereke qarsańynda jurtshylyq nazaryna ol dástúrlerdiń ne ekenin usynyp, olardyń shyǵý tarıhy men mán-maǵynalaryn ashyp kórsetýge kúsh salatyn bolamyz.

- Astana turǵyndary men qonaqtaryn taǵy qandaı mádenı sharalar kútip tur?

- Elorda turǵyndary men qonaqtary mereke aıasynda etno mádenı-sporttyq sharalardy, balalardyń biregeı etno-attraktsıondary men kontsertterdi tamashalaı alady. Sonymen qatar, qolóner buıymdary, ulttyq aspaptar kórmesi, kitaptar kórmesi, tarıhı jáne etnıkalyq jádigerler, etnobazar, sporttyq attar men qustardyń kórmeleri de jumys isteıdi. Aqyndar aıtysyn uıymdastyryp, kúı saıysymen kórermender qýanyshyn eseleı tússek degen josparymyz bar.

- Osy festıval aıasynda «Altyn jebe» І álem chempıonaty ótetinin estigen edik. Elimizge qandaı mergender kele jatyr?

- Osy festıvaldiń basty dodasy ózińiz aıtyp otyrǵan «Altyn jebe» І álem chempıonaty ekeni daýsyz. Bul básekege álemniń eń úzdik mergenderi kelip, naǵyz myqtyny anyqtaıtyn bolady. Bulardan bólek, 1 maýsym - Halyqaralyq balalardy qorǵaý kúni merekesi de umyt qalmaıdy. Eń bastysy 30 mamyr men 2 maýsym aralyǵynda «Han-Shatyr» kesheni mańynan tabylyp, qyzyqty birge bólisińizder. «Nur-Sultan Ethno Fest» merekesiniń saltanatty ashylý rásimi 1 maýsym, saǵat 19:00-de bastalady.

- Áńgimeńizge rahmet!