Rahat Turlyhanovqa qatysty apellıatsııalyq sot jabyq rejımde ótip jatyr

ALMATY. KAZINFORM- Áıeline qol kótergen Rahat Turlyhanovqa qatysty apellıatsııalyq sot jabyq rejımde ótip jatyr.

Aıyptalýshy men jábirlenýshi sýdıadan sot otyrysyna qatysýǵa kelgen buqaralyq aqparat quraldarynyń ókilderin shyǵaryp jiberýdi surady.

«Qurmetti sot. Men sot otyrysyna jýrnalısterdiń qatystysýyna qarsymyn. Eger múmkindik bolsa, olardy shyǵaryp jiberýińizdi suraımyn», - dedi Rahat Turlyhanov.

Prokýror men eks-ánshiniń qorǵaýshysy da erli-zaıyptylardyn ótinishin quptady.

Sýdıa Qanat Moldashev Rahat Turlyhanovtyń isin jabyq rejımde qaraý týraly sheshim qabyldady.

Buǵan deıin Almaty qalasynyń ákimshilik quqyq buzýshylyq isteri jónindegi mamandandyrylǵan aýdanaralyq soty taraptardyń tatýlasýyna baılanysty Turlyhanovqa eskertý ǵana jasaǵan. Alaıda prokýratýra sotqa narazylyq bildirip, apellıatsııalyq shaǵym túsirdi.

Eske salaıyq, ótken jyldyń jeltoqsan aıynda Rahat Turlyhanov úıinde janjal shyǵaryp, áıelin soqqyǵa jyqqan. Sot otyrysynda ol óz kinásin moıyndap, istegen isine ókinitinin jetikizdi. Sondaı-aq, tatýlasqandaryn aıtyp, sottan isti toqtatýdy suraǵan edi.

Keıin Rahat Turlyhanov pen onyń áıeli vıdeojazba jarııalady.

«Bizde bári jaqsy. Rahat, qamqor, meıirimdi jar ári áke. Iá, otbasynda urys-keris, túsinispeýshilik boldy. Biraq men buqaralyq aqparat quraldarynda jaǵdaıdy bilmeı jatyp, Rahatty ádiletsiz túrde jaman jaǵynan kórsetip jatqanyna qynjylam», - dedi Rahat Turlyhanovtyń áıeli Altynaı.