«Rahat» kondıter fabrıkasy karantınge jabyldy
Alǵashynda joǵary temperatýrasy bar 8 adam anyqtaldy. Sonymen birge 1450 qyzmetkerge test júrgizilgen. Osyǵan baılanysty QR Bas memlekettik sanıtar dárigeriniń qaýlysyndaǵy talaptarǵa sáıkes qyzmetkerler úı karantınine alyndy.
Fabrıka ákimshiligi óz sheshimimen jumysty 15 maýsymǵa deıin toqtatqan. Aýdandyq taýarlar men qyzmetterdiń sapasy men qaýipsizdigin baqylaý basqarmalaryna epıdemııaǵa qarsy sharalar tolyǵymen aıaqtalǵansha fabrıka jumysyn toqtatý týraly qaýly berildi.
«Kórip otyrǵandaryńyzdaı, sizderdiń taraptan qaýipsizdik sharalarynyń qamtamasyz etilmeýi uıym qyzmetkerleri arasynda aýrýdyń taraýyna jáne nysannyń jumysyn toqtatýǵa alyp keldi. Personal men kelýshiler termometrııasy, áleýmettik qashyqtyqtyń saqtalýyn qamtamasyz etý, sanıtaızer men dezınfektsııalyq quraldar qory bolýy kerek qoı. Sanıtarlyq-epıdemıologııalyq qaýipsizdik rejım sharalaryn qatań túrde saqtaýdy talap etemin. Maska taǵý rejımin saqtap, jeke qorǵanys quraldaryn (maska, qolǵap) aýystyryp turý óte mańyzdy», - dedi kásipkerlerge qarata aıtqan sózinde Jandarbek Bekshın.
Monıtorıng tobynyń baqylaý sharalarynyń barysynda 11-12 maýsymda 120 kásipkerlik sýbekti tekserildi. Onyń ishinde 29-nan tártip buzý faktileri anyqtaldy: «Aınbulaq», «Qazyna», «Mızam», «Ójet», «Ásem», Nazar JK, «Sochı» bazarlary, «Úrimji», «Ahaeva» JK ashanalary, «Stroı sıtı», «Alataý-2», «Jibek joly» MTTs, «Jibek-Joly» SÚ saýda ortalyqtary, «QOJAHMET» JK kantselıarııalyq taýarlar dúkeni, «Kabýldınov» JK, «Asoev M.K.» JK azyq-túlik dúkenderi, «KOMPRESSOR» JShS, «M-Retail» JShS qosalqy bólshekter dúkeni, «Sapsan» JShS medıtsınalyq kompanııasy, «Álııa», «Ásel» sulýlyq salondary, «Mesto vstrechı», «Prajechka», «Lýna», «Oscar cinema&karaoke», «Degirmen», «Istanbul», «light bar», «Almaty doner», «Tsentr shashlyka» dámhanalary.
«Maska rejıminiń saqtalmaýy, terige arnalǵan antıseptık pen dezınfektsııalyq quraldar, sanıtaızerdiń joqtyǵy, dezınfektsııalyq týnnelderdiń jaramsyzdyǵy, temperatýra ólsheý tártibiniń saqtalmaýy, sonymen birge kireberiste aqparattyq habarlandyrýdyń joqtyǵy syndy kemshilikter anyqtaldy»,– dep qosty Bekshın.
Monıtorıng toby jumysyn bastaǵaly beri qala boıynsha 2 606 nysan tekserilip, onyń ishinde 194-nen Almaty qalasy bas memlekettik sanıtar dárigeriniń qaýlysyndaǵy talaptar buzylǵany anyqtaldy. Soǵan baılanysty 94 nysannyń jumysy toqtatyldy.