Rahat Qaljan kúresten Azııa chempıonatynyń fınalyna shyqty

NUR-SULTAN. QazAqparat – Búgin Ulan-Batyrda (Mońǵolııa) ótip jatqan Azııa chempıonaty aıasynda erkin kúresten jarystar bastaldy, dep habarlaıdy QazAqparat QR Ulttyq olımpıada komıtetine silteme jasap.

Qazaqstandyq Rahat Qaljan 57 kelige deıingi salmaq sanatynda fınalǵa shyqty. Ol jartylaı fınalda qyrǵyzstandyq Almaz Smanbekovti 6:5 esebimen jeńdi.

Aqtyq synda Rahattyń qarsylasy Úndistan sportshysy Kýmar Ravı bolady.

Sondaı-aq eki qazaqstandyq atlet jubanysh fınalyna joldama aldy. Talǵat Syrbaz (70 kelige deıin) ben Mamed Ibragımov (97 kelige deıin) úshinshi oryn úshin talasady.

Fınal Nur-Sultan ýaqytymen 16:00-de bastalady.