«Rahat» fabrıkasynyń 500-ge tarta qyzmetkeri vırýs tasymaldaýshy bolǵan
ALMATY. QazAqparat – Almaty bas sanıtarııalyq dárigeri Jandarbek Bekshın onlaın brıfıng barysynda «Rahat» fabrıkasyndaǵy ahýalǵa qatysty túsinik berdi, dep habarlaıdy QazAqparat tilshisi.
Munyń aldynda «Rahat» fabrıkasynda koronavırýs ınfektsııasy tabylýyna baılanysty fabrıka jumysy toqtatylǵanyn jazǵan bolatynbyz.
«Rahat fabrıkasynda 30 mamyr men 4 maýsym aralyǵynda 10 adamnan KVI anyqtalǵan. Birinshi, fabrıkanyń bir qyzmetkeri josparly operatsııaǵa túsken kezde odan vırýs tabylǵan. Keıin zaýytqa kireberiste turǵan teplovızor arqyly taǵy 8 adamnyń qyzýy joǵary ekeni anyqtaldy. Sol sátte jedel járdem shaqyrylǵan. Qyzýy kóterilgen jumyskerlerdiń barlyǵynda koronavırýs ınfektsııasy bar ekeni anyqtaldy», - dedi ol.
Onyń aıtýynsha, fabrıkanyń 1500-ge jýyq qyzmetkeri tekserilgen. Olardyń ishinde 467 adamnan vırýs tabyldy. Olarda sımptom belgileri bolmaǵan. Olardyń barlyǵy úı karantınine jiberildi.
