Rahat Álıev «Nurbank» top-menedjerlerin óltirý jónindegi iske qatysty ustaldy - QR Bas prokýratýrasy
ASTANA. QazAqparat - Avstrııalyq tarap Rahat Álıevtiń isi boıynsha quqyqtyq kómekke júgingen jaǵdaıda Qazaqstan Respýblıkasynyń Bas prokýratýrasy tıisti kólemde kórsetýge daıyn. Bul týraly atalmysh vedomstvo taratqan habarlamada aıtylǵan.
«2014 jyldyń 5 maýsymynda Avstrııa Respýblıkasynyń quqyq qorǵaý organdary Vena qalasynda R.M.Álıevti ustaǵan.
Vena qalasynyń prokýratýrasy ókilderiniń málimdemesine sáıkes, R.M.Álıevti ustaýǵa «Nurbank» AQ top-menedjerleri J.Temirálıev pen A.Hasenovti urlaý jáne óltirý faktisi boıynsha tergeý materıaldary negiz bolǵan.
Munyń aldynda osy aıyptaýlar boıynsha ekstradıtsııa jasaýdan bas tartylǵandyǵyna baılanysty qazirgi ýaqytta bul tergeý jumystaryn Avstrııanyń quzyretti organdary júrgizýde.
Avstrııalyq tarap osy is boıynsha quqyqtyq kómekke júgingen jaǵdaıda Qazaqstan Respýblıkasynyń Bas prokýratýrasy ony tıisti kólemde kórsetýge daıyn.
Avstrııalyq taraptan osy is boıynsha resmı aqparattyń túsýi týraly qosymsha habarlanatyn bolady», - delingen habarlamada.
