Rafael Ýrazbahtın: Mundaı matchty tarıhqa jazýǵa bolady

ASTANA. KAZINFORM — «Qaırat» fýtbol klýbynyń bas bapkeri Rafael Ýrazbahtın Chempıondar lıgasynda «Qaırattyń» «Interden» (1:2) jeńilisinen keıin match týraly pikir bildirdi, dep habarlaıdy Sports.kz.

— Biz fantastıkalyq qarsylaspen — byltyrǵy fınalıstpen oınadyq. Olardyń deńgeıin bildik, sondyqtan bar kúshimizdi salýǵa tyrystyq. Jigitterge rızamyn, oıyn meniń josparyma saı ótti. Iá, qatelikter boldy, biraq mundaı matchtardy tarıhqa jazýǵa bolady. Osyndaı kezdesýler bolashaqqa senim uıalatady. Kórermenderdiń osynshalyq kóp jınalǵany biz úshin kútpegen ári erekshe qýanysh boldy, — dedi Ýrazbahtın.

Bapker ataqty «San-Sıro» arenasyna qaıta oralǵan sátin erekshe oqıǵa dep atady.

— Bul stadıonǵa bapker retinde qaıta oralamyn dep eshqashan oılaǵan emespin. Bul — ǵajaıyptyń bolatynyn dáleldeıdi, — dedi ol.

Maman aldaǵy «Kopengagenge» qarsy oıynǵa daıyndyq barysyn da baıandady. Onyń aıtýynsha, chempıonat maýsymy aıaqtalǵan soń jattyǵý úderisi kúrdelirek bolmaq, biraq úsh aptalyq úzilis komandaǵa tolyq qalpyna kelýge múmkindik beredi.

— Jigitterge birneshe kún demalys berdik, óıtkeni fızıkalyq qana emes, moraldyq tynyǵý da qajet. Qazaqstanda chempıonat aıaqtalǵan soń, jattyǵý ótkizý qıyn, biraq bul úzilis bizge paıdaly bolady, — dedi bapker.

Rafael Ýrazbahtın óz komandasynyń Chempıondar lıgasyndaǵy progresin de atap ótti.

— Biz úsh myqty klýbqa qarsy oınadyq. «Pafospen» kezdesýde artyqshylyǵymyzdy paıdalana almadyq, bálkim tájirıbeniń azdyǵynan bolar. Aldyńǵy qatarly komandalarmen oınaý — úlken mektep. Biz durys baǵytta kele jatyrmyz jáne jeńisterge senemiz. Osyndaı týrnırlerge turaqty qatysý klýb damýyna serpin beredi, — dedi Ýrazbahtın.

Aıta keteıik, búgin qazaqstandyq «Qaırat» syrt alańda «Interge» ese jiberdi.